根據現行法例，僱員若被僱主拖欠工資，可透過勞資審裁處追討，不過，縱獲勝訴，法庭是不負責執行裁決，僱主避而不見或藉詞拖延，僱員仍難以追回欠薪。本報不時接獲此類投訴及求助個案，投訴直指追討程序繁複且費時。
「去年九月都已經審結咗，明明判咗被告要賠錢；但追咗年幾都只係得個桔，追討又費時！」感到相當憤慨的林女士向本報投訴稱，她與丈夫林先生兩年多前受聘於一地盤判頭到地盤工作，負責鋪地板工序，夫婦倆工作了個多月，其後向判頭索取工資時，卻一直被藉詞拖延。
「嗰個無良判頭，次次都話問緊大老闆追錢，我哋斷斷續續咁追咗佢半年，都係無晒下文。我哋真係乜嘢辦法都無晒，最終惟有循法律途徑追討。不過，原來都係無用嘅！」
林女士稱，這宗勞資糾紛經勞資審裁處審訊後，去年九月審結，法庭宣判她與丈夫可獲發還共一萬九千元工資，當初本以為從此可取回血汗錢，豈料僱主遲遲不肯賠償，最後更連電話也不接聽。
「我哋曾經喺街遇到佢，佢重理直氣壯咁話：『𠵱家係法庭判話要畀錢你啫，你有本事咪叫法官判我坐監囉！』我哋一直以為經法庭處理完，就一天光晒；原來佢哋﹙法庭﹚係唔負責執行！點解無一個完善啲嘅機制去監管呢？」
林女士其後向法律援助署求助，但法援署建議她可申請對方破產，惟她需先付九千元費用，而且亦需聘請律師替其處理。
「如果我拎得出九千幾蚊，就唔使日撲夜撲都要諗辦法去追番嗰筆工資啦！如果最終都係搞唔掂，咁咪連呢筆錢都無埋？最終都係得不償失！」
感到投訴無門的林先生夫婦，不滿追討欠薪制度不夠完善，「喺咁嘅制度之下，我哋呢啲打工仔，根本就無保障可言，最終係咪都要被迫放棄追討應得嘅嘢！」
（一○一一一二）
服務熱線
電話:29908288
傳真:23702192
電郵: