三千Fans現身嚇窒主持
Twins廣州蓋印變咗Cheese

人氣組合Twins昨日在廣州舉行寫真集蓋印會，兩位成員蔡卓妍及鍾欣桐在四十五分鐘內，共蓋印逾二千個，而現場近三千名fans為一睹Twins的風采，不惜騎膊馬及爬上車頂，兩位內地司儀更緊張得將Twins稱呼為Cheese。　記者李珮洳、仇志德廣州直擊

英皇人氣組合Twins昨日於廣州美居中心出席「Twins2002寫真集蓋印會」，吸引近三千名市民圍觀，而兩位成員蔡卓妍及鍾欣桐在短短四十五分鐘內，一共蓋印二千一百零二個。由於Twins未有足夠時間完成蓋印工作，故此英皇方面抄下其餘已攞籌的輪候者聯絡電話，於稍後補發蓋印。

險象環生
昨日蓋印會人頭湧湧，為免出現混亂情況，現場約有三十名保安及公安維持秩序，部份fans為一睹Twins的風采，不惜騎膊馬以及爬上車頂及大樹上，險象環生。雖然fans不時起哄，猶幸秩序良好，有fans上台時向Twins大叫「Iloveyou」，有的則看得發呆，亦有fans單單在台邊看見Twins的腳和鞋底，已經不停大叫。
不過今次活動中的兩位內地司儀顯得非常緊張，頻頻講錯說話，而他們的英語發音又不大準確，竟將Twins稱呼成Cheese、Tips、Teams及Jims等，總之讀來讀去也無法讀得標準。

「啤得滿意」
對於今次的蓋印會，Twins笑說：「我哋做咗工廠妹，好似啤膠咁，今日啤膠啤得好滿意，我都好開心，啲內地fans咁熱情，可能係因為唔係成日見，頭先有個妹妹仔因為跌咗本書，冇得蓋印而喊，我哋就幫佢印咗落張紙度囉。」