近日某周刊刊登一個女星早年被強迫影嘅裸照做封面，唔單止引起社會各界猛烈抨擊，就連一啲江湖人士都睇唔過眼。好似噚日凌晨三點幾，有位「江湖大佬」喺跑馬地Studio1酒吧消遣，佢喺門口一見到記者就好㷫咁走埋去問：「邊個係《×周刊》同《××新地》記者？俾我知道邊個係×××啲人，一定打佢××××。大家唔使驚，我淨係揼佢哋啲人啫！」
跟住個「江湖大佬」向記者逐個查記者證，搞到某周刊班記者即刻走上車唔敢露面。
唔單止係江湖人物，連杜汶澤噚日凌晨同女友田蕊妮蒲完Studio1出嚟，都好勞氣咁話：「嗰啲唔×係人，登埋啲咁嘅相，賺埋啲咁嘅錢。」田蕊妮怕杜汶澤講多錯多，於是惟有幫佢兜番話杜汶澤飲大咗，然後急急腳拉佢走。呢件事搞到全城咁反感，唔知嗰本周刊點收科？
吳文忻同陳昭昭等前晚去跑馬地Alabar出席萬聖節派對，吳文忻扮到成個埃及妖后咁出現，佢用咗兩個鐘化呢個裝。吳文忻話：「我本來想將血漿淋上面，但怕惹烏蠅。我又唔敢太性感，驚俾人捉去影相點算。」對於有女星被登慘情裸照，吳文忻話：「佢好慘，女藝人出入要小心，夜返屋企都會搵男友接送，我覺得登人呢啲相好唔道德。」
劉鑾雄（大劉）日前開記者會，力證有羅文親友做中間人同佢借一百萬，但羅文家姐就否認呢件事。噚日記者打電話畀劉培基，原來佢已經返咗泰國，佢話：「我都𢱑晒頭，佢兩個我都信，佢家姐誓神劈願同我講，話冇收過人哋錢，但劉生開得記者會，咁就梗係有件咁嘅事，但究竟邊個係中間人，劉生應該講出嚟，咁樣會公道啲。」大劉曾經暗指有人是「姿整佬」，劉培基話：「冇法㗎，我本身唔姿整，係做嘢姿整。」
男子組合Shine噚日喺沙田出席簽名會，佢哋因為去錯地方而遲到。有報道指Shine日前跟好友余文樂去唱卡拉OK，重幫余文樂追鍾欣桐（阿嬌），Shine話：「嗰次去唱歌係全男班，都冇見過阿嬌。傳媒成日寫余文樂𠝹女，佢都有唔開心。」