三十六名港區人大代表下個月選，九龍灣國際展貿噚日召開選舉會議第一次會議，好多達官貴人都係選委，八方當然要去湊吓高興。
會議保安好嚴密，但其他嘢就比較求其，好似嗰份完全政治不正確嘅會議公告，原稿冇打到「中華人民共和國」七個字，只有「香港特別行政區」；原本十點開始嘅會議就押後咗二十四分鐘至開始等等。
而近期成為風頭躉嘅田二少田北辰，因為要開語文教育及研究常務委員會會議，竟然姍姍來遲，成十點三十五分先到場！八方同行家會後笑二少遲大到，話口未完，田大少田北俊馬上攞起手上嘅file拍打記者。
八方呢頭俾人拍完，嗰頭又見到被選為選舉會議主席團成員嘅鍾士元被傳媒追訪，點知佢老人家真係好有性格，無論問佢財赤、問責制、民主派參選，都一於用背脊向住記者，重笑大家唔會迫到佢講嘢。有攝影大哥問大Sir邊個迫過佢？佢話：「我做緊嗰陣時囉。」攝影大哥笑說，都係得共產黨迫佢啫！大Sir聽到後終有啲反應話：「乜你咁講嘢㗎！」
（圖）田少（左）為咗同遲到嘅細佬（中）解圍，竟然搞笑地用file拍打記者，果然手足情深。
傳真︰2623-9278
電郵︰