大眾踩單車郊野上……如今一家大細郊遊，都係揸車方便，大人細路連燒烤包一齊塞晒入七人車，踩油長驅直進大帽山，先在山腳底嗒杯山水沖泡的靚早茶，落田採時令西洋菜；下午衝上山頂，觀賞大吊橋在我腳下的懾人美景。午飯時候，踩油兜落大帽山郊野公園BBQ。途中碰上一班年輕人，但見他們青春活潑，心中竟然泛起昔日絲絲的回憶，不禁令我慨歎……
記者：楊一凡
攝影：陳陶鈞
車輛提供：合群汽車（23802231）
早聽說過川龍山水茶寮的大名，但採訪當天才知茶樓叫端記，川龍是村名，「端」取自老闆曾昭端之名。他開茶館前主力包伙食，20年前開茶樓，以山水泡茶作賣點：茶味更香，茶湯不澀，茶味猶存。水源自大帽山山腰，水質多年不變，因為村民自組義務顧問團監察水質，負責的村民有專門水利知識，並定期進行水箱檢查及水道維修。
如今茶樓由孻子輝哥揸Fit。輝哥，後生時有想過出外闖嗎？輝哥點頭說：「中學畢業時，曾勇闖過但無起色，三位哥哥做政府工，無時間打理茶樓，眼見父親年老，惟有靠我啦。」輝哥睇場有兩年，在經濟低迷期間，端記生意穩定，不斷有Fans慕名而來，生意之道在於：收費不貴，茶芥$2位，點心至貴$12。
黃大姐五代務農，田舍在茶樓對面，每日把鮮果蔬菜推到茶樓寄賣，適逢西洋菜當造，端記每日在黃大姐那裏入六、七斤貨，日賣30碟清甜脆嫩的白灼西洋菜。沿茶樓側的小路拾級而下，可見八畝西洋菜菜田，由農曆八月十五至翌年五月初五都有得食，茶客可走到農地取菜，但見黃大姐赤腳叉落泥地，唧唧有聲，哨哨兩聲，斤幾重的西洋菜在手，承惠$10，每日約賣出十五、六包。茶客習慣在歎茶前落柯打，走時取菜。田間無電話點柯打？輝哥說：「離遠大喊囉，喂！一陣三包吖！」西洋菜種兩、三星期便可食用，聞說西洋菜易長蜞乸喎？黃大姐說：「塊田流活水，乜都沖走。」大家放心食用啦。
店名：端記茶樓
地址：荃灣荃錦路川龍村57至58號
電話：24905246（不設訂位）
營業時間：早上6時至下午2時
停車場：有20個露天車位，隨茶樓營業時間開放
最近一次去大帽山是為了看結霜？其實晴空下，大帽山左擁石崗軍營，右抱青馬大橋。軍營附近有歐洲小鎮Feel的叢林，有驚喜！若然霧氣消散還可遠眺至元朗。若把車泊在山腳的停車場，行個半鐘，到山頂，會好索氣，還是驅車好。下山後可到郊野公園燒烤。遇上一群中學生，熟悉的烤肉香撲鼻，傳來陣陣玩「數字球」的歡笑聲，不禁懷緬：「唉，最近一次秋季旅行……都好多年前囉。」不是眼紅少年人，只是感歎懵懂的青春歲月，老早捨我而去。老友，光陰似箭要珍惜。
郊遊路線
從荃灣地鐵站出發荃錦公路(約10分鐘)川龍歎茶
荃錦公路轉入大帽山路(約15分鐘)山頂
大帽山路(約10分鐘)大帽山郊野公園BBQ
原路折返
荃錦公路多彎位
從荃灣地鐵站出發到川龍，必經荃錦公路，此路彎位特多，閒閒哋五、六個，叫做有難度，故此在澳門賽車前夕，晚上會變成飛車黨練車路段；人家入黑飆車，跟我們白天逍遙遊不同，一家大小上路，30咪至40咪車速至穩陣。
大帽山路要響按
沿大帽山郊野公園直上，山路非常窄狹，只是平日車路的一半，遇着對頭車就繃繃緊，所以轉彎時必須響按，別被兩旁優美的山景分散注意力。