屢傳不和的無綫花旦佘詩曼（阿佘）及郭羨妮，昨日一同出席手提電話活動時，手挽手兼咬耳仔，似以行動粉碎不和傳言，但對於早前阿佘與陳浩民涉被人勾線盜錄對話，講方中信是非一事，郭羨妮就暗寸阿佘：「是非直情唔應該講啦！」
佘詩曼（阿佘）及郭羨妮（Sonija）兩位無綫花旦，近期屢傳不和，但昨日二人在中環麗嘉酒店出席一隻韓國手提電話推介酒會時，她們卻表現友好，手拖手滿場飛有如孖公仔一樣，在人前又咬耳仔密密斟，擺明以行動力證冇不和。
阿佘早前涉被人將她與陳浩民的一段電話對話上網，對話內容並大講方中信及其女友莫可欣之是非，問Sonija會否怕遇上同樣情況？她說：「冇得驚嘅，普通人都會畀人偷聽，但啲人唔識啫，冇得驚又冇得防，所以有時我會sendmessage（傳短訊）畀人哋。」
問Sonija是否怕遭人偷聽對話所以傳短訊？她卻暗寸阿佘道：「是非直情唔應該講，就算面對面都唔應該講是非，可能隔籬有人聽到吖嘛。」
至於方中信日前與阿佘食飯，昨日阿佘也承認確有此事，但她是與劇集《花樣中年》台前幕後同往，並不是和方中信單獨共膳。
而大會昨日向現場所有嘉賓送贈手機一部，問阿佘會否對講電話存有陰影？她說：「睬佢都儍，冇得好驚，阿媽教我，世事豈能盡如人意？但求無愧於心。」
其他到場的嘉賓有韓君婷、陳豪及蕭正楠，大會更宣布由盧巧音擔任該手機代言人。
對於前緋聞男友謝霆鋒因超速駕駛被罰款七千元及停牌一年，盧巧音說：「官司嘅嘢唔講，叫佢唔好揸車囉，怕咗佢啦，佢都要後果自負。」
採訪：王連連
攝影：仇志德