《魔戒》特技攞硬奧斯卡
肥妹莉芙靠電腦執到正

舊年《魔戒首部曲：魔戒現身》有幾威水，大家都應該重記得，部戲全球票房收到嘭嘭聲，重攞埋四個奧斯卡，所以唔少fans，包括我大口羅拉都好期待佢嘅第二集《魔戒二部曲：雙城奇謀》。

兩年前拍完
成套戲最吸引我大口羅拉嘅，當然係女主角莉芙泰萊（LivTyler）啦！平時都幾肥嘅莉芙，喺部戲入面真係瘦好多索好多噃，相信個個女人都好想知佢點解可以執番正個殼。不過聽啲電影界朋友爆料，話電影公司係用電腦特技執靚佢嘅肥身材，但我又要講番句公道話，部戲其實已經拍咗兩年，莉芙肥完又瘦、瘦完又肥，都唔係好出奇啫。

對抗強獸人
雖然部戲要到下個月十八號先會喺歐、美上畫，不過早幾日我已經見到部戲嘅最新海報曝咗光。
講番部戲先，今集嘅劇情已經去到高潮，伊利亞活（ElijahWood）飾演嘅主角佛羅多同僕人山姆一直向住摧毀魔戒嘅旅程進發，不過比半獸人更厲害的強獸人軍團亦已經培育咗出嚟，真係戥班魔戒遠征隊員牙煙呀。