家陣炒細價股，成功散貨嘅機會究竟有幾高呢？小初同好多老友傾過，普遍覺得唔容易，若炒家勉強炒高，最終搞到錢就使晒，而自己就成手都係貨。
批股亦算批得密嘅創富生物科技（340），幾乎次次批完股之後，例牌都會波動一輪。公司在9月份時，以每股0.10元，配售1.993億股新股，或已擴大股本16.7%，集資約1950萬元。由於批股價較當時市價有溢價，所以市場一直睇緊接貨者幾時郁手炒高。
唔知係咪配售新股所需時間較長，創富直到噚日，股價先至有異動，升13.3%，收9.4仙，成交金額332.8萬元。現時配股價仍較市價有溢價，睇嚟接貨者冇理由在現水平走貨。
如果小初冇記錯，創富每次批股，接貨者都唔同，有次撞着個年輕炒家接貨，佢三扒兩撥將股票掟晒出街。唔知今次呢班人又會點玩？但咁嘅市況，只有祝佢好運。
慕容小初