日前出版的《東周刊》刊登了某女星多年前被強行拍下的裸照作封面，瞬即引來各界強烈譴責。而受害女星身邊的好友亦紛紛表示關懷，鼓勵她站出來勇敢面對，報警求助，據知受害人在好友的支持下，除情緒好轉外，亦有意向警方透露事件真相。
最新一期《東周刊》的封面刊登了某女星一張多年前被強迫拍下的裸照，事件連日來引來極大迴響，昨日香港電影界九大屬會召開記者會，強烈譴責該周刊為求促銷，埋沒良知，毒害下一代，並將銷量建築在受害人的痛苦上，呼籲市民罷買和罷看。而立法會八大黨派亦達成共識，強烈譴責今次事件。
據知在該裸照未被雜誌刊登前，曾有人意圖勒索受害女星，聲稱若不肯滿足要求，便會將相片流傳出去，疑因受害女星不甘就犯，才導致事件發生。而受害女星身邊的朋友均對事件感到極度憤怒，紛紛與女星保持緊密聯絡，除加以慰問外，亦鼓勵女星勇敢地站出來報警。據知受害女星在一眾好友的支持下，情緒已好轉不少，正考慮向警方和盤托出真相。
對於一眾演藝人和多個團體聯名召開記者會，強烈譴責《東周刊》一事，城中富豪劉鑾雄（大劉）昨日接受本報記者訪問時說：「呢件事一定要處理，因為影響好深遠、好嚴重。你諗吓，呢個罪行其實嚴重過綁票，綁票嚟講，家人多數都會報警救人，而且拉到人多數判得好重。但係迫人影裸照，拉到最多都係坐兩年監，而且作為受害者嘅丈夫、父母或仔女，多數都唔敢去報警，因為就算報咗警拉到人，佢哋都會驚啲相唔知幾時會流咗出街，或者喺網上流傳，所以一定多多錢都肯畀。𠵱家重有周刊夠膽去登，或者係肯用錢買返嚟登，對於歹徒嚟講，又多咗一條財路同埋勒索嘅途徑，更加鼓勵多啲人去犯罪。」
問到大劉認為有甚麼好方法可解決今次事件時，他說：「作為小市民，唯一可以做嘅就係依靠香港政府，但係到目前為止，大家都有目共睹，有啲人仍然逍遙法外，完美嘅解決辦法暫時大家都未諗到，我喺度呼籲廣大市民，如果諗到好嘅對策，可以向政府提議。」
好姨薛家燕昨日亦在電話中說：「我好支持事主企出嚟面對，因為警方一定可以幫到佢，法律係公正嘅，邪不能勝正，大家唔可以助長呢啲歪風。不過，我哋始終唔了解成件事嘅過程，如果事主冇理虧，一定要企出嚟將匪徒繩之於法。」
至於鄭裕玲（嘟嘟）對受害女星的遭遇亦寄予同情，但卻表示若自己是受害人，亦未必敢站出來面對一切。嘟嘟昨日在電話中說：「如果企出嚟講嘅話，可以告到本周刊咁固然係好啦，但呢樣嘢真係好難講點做，始終當事人要承受好大壓力。受害人好可憐，政府應該正視呢個問題，做藝人真係好驚，傳媒乜都話新聞自由，但就冇一條界線，好似王菲咁，喺屋企睇書都俾人影相，陳寶蓮死咗又俾人影佢條屍，但今次重慘，身為香港人，我真係覺得好失禮！」
嘟嘟續說：「嚴重啲嚟講，嗰張相其實係賊贓，係犯罪證據，喺呢度我希望所有人唔好再將呢張相用e-mail傳嚟傳去，今日我已經收到三封e-mail傳張相畀我，我全部delete晒，有良知嘅人唔好再去傷害當事人。」
曾被賊人挾持入屋打劫的溫碧霞，昨日則透過助手回應說：「我冇睇過報道，亦都冇打算睇，我只係覺得當事人好慘，對其他嘅嘢，我唔會發表任何意見。」