渣打銀行有百幾年嘅歷史，但銀行嘅執行董事及高級行政大員，原來絕大部份都唔係自己訓練出嚟嘅，多數係外援，多數係九○年以後加入渣打嘅，真真正正嘅渣打產品只有三位，其中一位就係黃遠輝，四十六歲，現任中國區執行總裁。黃遠輝喺一九七四年六月十七日加入渣打，至今已有二十八年，當年黃遠輝中學畢業，十八歲仔到處搵工，TVB請咗佢做「擔咪」（即係揸住個好似掃把頭咁樣嘅咪，做現場收音），佢好醒目，唔制，走咗去渣打做練習生，之後係咁升，升到現時成為中國區一哥。
點解渣打咁多年，都培訓唔到大批高層幹部，反而要由花旗銀行（戴維斯、王冬勝及其他）及美國銀行（主要係印度人）挖角呢？睇怕都係家花不及野花香，譬如張永森（Ambrose）七三年畢業於港大（即係阿松、葉澍堃、馬時亨同班同學），加入渣打做trainer，冇幾耐就走咗，佢啲「同年」，唔通亦統統走晒？一間老牌銀行嘅核心高層，個個嘅服務年資都只得十年八載，真係好少有。滙豐銀行就完全唔同，龐約翰、艾爾敦、柯清輝等等全部都係由低升上去嘅。
渣打最大股東就係邱德拔，擁有一億五千七百三十二萬九千幾股，佔13.87%。班執行董事嘅薪水唔高，行政總裁戴維斯攞齊晒都係一千零五十萬（○一年），基本年薪得六百五十萬港元（○二年），都好克己啫。