沈殿霞、劉培基和鄧光榮否認本報日前報道羅文家人曾透過中間人向劉鑾雄（大劉）借一百萬一事。昨日大劉力證事件屬實，並透露曾答應中間人借五十至一百萬給羅文的家人。
本報日前報道羅文生前為應付龐大醫藥費，向銀行借了約一百九十萬，另加上臨終前八萬多醫藥費以及司機、工人等遣散費十多萬，其家人急需一筆現金周轉，故透過中間人向大劉商借。大劉答應日內送贈一百萬予羅文遺屬，但其後沈殿霞、劉培基和鄧光榮均聲稱羅文沒有欠債，亦沒有向大劉求助。
昨日又有消息指羅文助手阿東稱羅文胞姊不認識大劉，亦沒透過第三者向大劉借錢，大劉昨在辦公室開記者會澄清。他說：「殯儀之星唔好再搵啲茶水阿嬸出嚟講嘢，我從來冇同傳媒或者任何朋友講過話識得羅文家姐。至於借錢一事，我好鄭重咁講，呢個係事實。」
大劉交代事件經過：「喺九月份有朋友打電話畀我，佢係出於一片好意，話某藝人周轉困難，原本喺美國銀行有二百六十萬嘅透支額，但因為病重，用到約一百九十萬銀行就唔肯再借。呢個朋友想我買咗佢層樓嚟解決資金周轉問題，我唔肯，因為到時層樓升咗或者跌咗價，都會俾人講。我就應承介紹其他銀行或財務公司做呢單借貸，不過最後美國銀行都肯畀佢分期每月還二萬幾蚊。」
大劉續說：「其後我都同呢個朋友講，乜嘢事都可以搵我幫手，名我就唔出，但係個過氣龜婆竟然講話等殯儀之星搞，除非殯儀之星唔做，先畀個傻仔做。
「直到二十四號，呢位朋友好急咁搵我，話『阿西』同『T君』日日催佢，因為醫院嘅出院費、護士費、司機嘅遣散費都未找，所以代其家人問我借五十至一百萬嚟周轉，我就應承咗。羅文嘅家姐同細妹一定對呢件事知情，因為我助手同律師傾過呢件事，借錢嗰方嘅代表係羅文家姐同細妹。」
最後借錢一事因為本報報道後不了了之，大劉說：「如果有需要，我仍然會借，但係我相信呢個機會好微，因為殯儀之星硬住頭皮都會攞出嚟。」
大劉又指「阿西」副業是替某兩份周刊搜集情報，他說：「一次我去歐洲，喺機場某周刊搵十幾人招呼我。另一次喺348，我行後門走，竟然都有某周刊嘅人企定喺後門等我。」問大劉近日是否很嬲？他說：「唔嬲，殯儀之星搞啲嘢日日新鮮鑊鑊甘，我要嬲咪好短命！」