最新一期《東周刊》刊登了一張某女星早年被強迫拍下的裸照作封面，劉鑾雄昨日聲稱曾與受害女星聯絡，並勸對方報警。劉鑾雄更透露受害人親口向他控訴該雜誌說：「點解要將我十幾年前嘅瘡疤挖爛，然後再喺上面灑啲鹽畀人睇！」而影視處兩日內更接獲九十三個對該周刊封面的投訴。
日前出版的《東周刊》刊登了一張某娛樂圈女藝人早年遭強迫拍下的裸照作封面，事件引來娛樂圈中人和各界的猛烈抨擊。前日城中富豪劉鑾雄（大劉）已呼籲政府應高度注視此事，他指事件已影響到整體市民的安危。昨日大劉在其灣仔辦公室，自稱曾與該受害女星通電話，對方更向他控訴該雜誌說：「點解要將我十幾年前嘅瘡疤挖爛，然後再喺上面灑啲鹽畀人睇！」
網上流傳冇格版本
大劉昨日接受記者訪問時說：「嗰本周刊出張相係打格仔嘅，但𠵱家網上周圍流傳緊一張完全冇打格嘅相，原因當然有人想證明係堅嘢，擺到明騷quali，使橫手喺網上搞鬼。呢件事嘅迴響好大，直情係白色恐怖。
「今次呢張相，我諗最多唔會超過二十萬，因為即使送畀第二間傳媒，人哋都未必敢登，所以有人一定會壓價。」
事件重會陸續有嚟
大劉又聲稱曾與受害女星通電話，他說：「我有勸過佢勇敢啲出嚟面對呢件事，好應該去報警，至於佢有乜反應，我就唔方便代答，因為係人哋嘅私隱，佢親口同我講：『點解要將我十幾年前嘅瘡疤挖爛，然後再喺上面灑啲鹽畀人睇！』
「我識咗女星十幾年，雖然平日冇乜來往，但因為呢件事，好多朋友嘅距離都拉近咗，大家好憤怒亦好團結，你哋做旁觀者都憤怒啦，何況係佢朋友。起碼有超過一百幾十個朋友鼓勵受害人去報警，好多朋友都話想做番啲嘢。
「我呼籲大家唔好得個講字，如果到最後都冇反應，事件重會陸續有嚟，大家要明白兔死狐悲、唇亡齒寒嘅道理。其實我好明白受害者唔敢企出嚟嘅原因，佢只係一個普通藝人，點有能力同啲不法商人鬥？」
93宗投訴相片不雅
問到該女星可有要求大劉出手相助時，大劉說：「暫時未有，能力範圍可以幫到嘅，無論係出錢出力我都會去做，當然除咗犯法嘅嘢之外。」
問到可會懸紅捉拿幕後黑手時，大劉說：「懸紅有乜用先，就算大家知道係邊個做咁又點？當年嘅事已經過咗咁耐，今時今日登啲咁嘅相，係咪比起當年嘅犯罪重嚴重呀？」
此外，記者昨日致電影視及娛樂管理處查詢可有接獲對《東周刊》赤裸女星封面的投訴時，負責人蔡先生回覆直至昨午五時止，該處共接獲九十三宗投訴，都是指摘相片不雅。