傳統名校皇仁書院創校一百四十年，星期日喺會展筵開一百八十席慶祝。呢間國父孫中山讀過嘅學校，威水史多籮籮，知名校友輩出，「皇仁仔」莫不以母校為榮，一提起就驕傲非常。八方早前同佢哋傾偈，原來當年有一句順口溜提及政府決策高官：「唔係皇仁、唔係華仁，就係女人！」
不過世事難料，睇返今日政府嘅決策層，三司十一局中竟然已無一個係皇仁仔！當年叱咤風雲嘅前財經事務局局長許仕仁、前資訊科技及廣播局局長鄺其志等，都先後跳出政府。老許過檔積金局做行政總監，但最近都要遞信；鄺其志做港交所行政總裁，卻因細價股風波被傳冇得續約。
其餘皇仁舊生，如現任市建局行政總監林中麟、立法會秘書長馮載祥，亦分別放棄原先嘅政府高薪厚職，唔再做官。勉強要數，阿董班底只有一個特首辦主任林煥光，讀過皇仁預科。
皇仁仔講起此情況都好沮喪，佢哋話「新法仔」馬時亨當時得令，許仕仁、鄺其志冇法子唔讓開；不過塞翁失馬，焉知非福，現時政府立立亂，全面撤退，反而可以明哲保身，至於上面嗰句順口溜，有人就改咗做：「新法仔當道，皇仁仔當黑」喎！
傳真︰2623-9278
電郵︰