左丁山睇招股書，最鍾意睇「董事、高級管理人員及員工」嗰部份，有資格在榜上有名嘅，都係話事及執行人。公司歷史、業績、前景係好重要，但唔重要得過啲管理人，呢班人唔掂，公司都唔會掂，要投資股票，首先要認識嗰班話事人，招股章程就提供最基本嘅資料。
渣打銀行上市，反應唔係幾好，其實呢隻股票喺倫敦早已有得賣，基金對佢嘅興趣當然唔會熱烈啦。渣打董事局有啲乜嘢猛人呢？十六位董事中，有六位執行董事，一位非執行董事，九位獨立非執行董事，其中有三位華裔，就係恒隆主席陳啟宗（美國人）、香港出身嘅周松岡爵士（英國人）、何光平（新加坡人）；香港渣打銀行大廈嘅大業主就係恒隆集團，陳啟宗做渣打獨立非執行董事，理由好易明白。其他兩位同渣打咁好關係，左丁山唔知噃。周松岡爵士係中文大學三年制MBA校友，據賓架P話，與周爵士同班嘅，有陳鈞潤、關越強、陸觀豪、伍達倫博士、彭玉榮等。
何光平就係記者偶像。記得二十年前左右，何光平係《遠東經濟評論》記者，一兩篇報道令新加坡政府唔高興，自己成為新聞人物；佢真醒目，知道做記者坐監易，發達難，立即轉行搞酒店物業，好多賓架住過嘅高爾夫球酒店BanyanTree（布吉島）就係佢嘅，何光平大名響遍東南亞，發過記者好多。