「羅馬王子」托迪不嬲都鍾意鬧吓人同寸吓人，羅馬喺禮拜三場「雙馬」戰砌低皇馬後，佢唔寸人就勢係假。賽後佢就點名批評費高同埋魯爾嘅表現令佢失望喎，擺明踩人啫。我求大俠心諗，皇馬輸咗都出到線，費高同埋魯爾使乜博吖，阿王子搵場咁嘅波做標準，無意思㗎。
雖然托迪喺世界盃踢得唔好，但據聞佢重有少少機會爭歐洲足球先生，所以我求大俠就以小人之心去諗，佢番言論擺明係想挫魯爾同埋費高氣燄。之但係托迪又同時讚喺意甲踢過波嘅朗拿度同卡洛斯。如果佢唔係想話踢過意甲特別醒，就一定係妒忌費高同魯爾靚仔過自己嘞。
啱啱踢完四百場意甲比賽嘅巴治奧雖然篤信佛理，但重係火氣十足。佢本自傳新版喺噚日出街，主要內容當然係炮轟意軍教頭查柏東尼唔選佢踢今夏世界盃啦，預計呢本自傳肯定再掀搶購潮。老查𠵱家已經好似待宰羔羊咁，隨時無得撈，今次再俾萬人迷巴治奧本自傳彈一彈，恐怕連所餘無幾嘅聲望都無埋。
我求大俠聽講南韓最近好流行網上小說，好多係將南韓世界盃國腳作為主角，內容天馬行空，當中重有啲將金南一、宋宗國同埋朴智星等球星作為同性戀故事嘅主角，內容非常露骨。我求大俠絕對唔歧視同性戀者，不過從來無消息話呢幾個球星係同志，咁樣老屈好似唔係太尊重佢哋喎。話晒人哋幾個月前重幫國家打生打死攞到個世界盃殿軍嘛。
噚日一早起身睇姚明NBA處子戰嘅國內、外球迷，好可能大失所望。我求大俠亦有同感，不過諗深一層，姚明只不過剛到美國十日，同埋打咗兩場NBA熱身賽之嘛，重要日日俾班記者死纏難打追訪，喺生理同心理上都未有充足準備下，喺首仗表現失準亦無可厚非。佢自己之前講過要用十場比賽嚟適應，我哋不如就畀十場時間姚明，到時再講都唔遲喇！
真係搵食艱難！原來𠵱家做球員唔單止要好波，重要識做戲㖭。話說巴西保地花高對彭美拉斯之前，踢過彭美拉斯好多年嘅保地花高中場加里奴，誓神劈願話就算入到波都唔會慶祝，以示尊重母會喎。不過保地花高個副會長就好搞嘢，話如果加里奴入到波就送千幾蚊美金畀佢──附帶條件係入波之後點都要作個慶祝樣。咁都得？