房屋協會執行總幹事呢個燙手山芋一職終於塵埃落定，由「紅褲仔」出身嘅房協老臣子王麗珍出任。
王大姐可以話係房協嘅活字典，六七年起加入房協，由勵德邨開邨，一步一步由低做起，至今已經做咗三十幾年，聽講房協內事無大小佢阿姐都無所不知。
有人對八方話，今日上任嘅王麗珍，首要處理嘅大事就係同市建局合併，呢宗由煲呔及孫公一手促成嘅婚姻，已經進入同居關係，問題在於幾時擇日成親，共諧連理。其實呢對寃家各懷鬼胎係人都知，市建局嘅林中麟睇中房協嗰筆二，三百億資產，好想迎娶呢個有錢女；房協就一直對市建局多項賺錢嘅重建計劃虎視眈眈，諗落呢段姻緣可能係前生注定。
最令八方好奇嘅係一旦合併，王大姐會唔會成為房協最後一任執總，一手摺埋做咗數十載嘅機構呢？
（圖）王麗珍喺房協做咗三十幾年，今日升為執行總幹事。
傳真︰2623-9278
電郵︰