大市調整，進入第3日，恒指收市9441，跌119點，成交48億元，期指更低水40點。恒指跌穿50日線後，市場氣氛又再轉淡。噚日午後跌勢轉急，主要係受到中國電信（728）話會延遲上市的傳聞所拖累。
中電信招股周三已截止，開始時就話足額認購，噚日則傳出國際認購不足額，下周初重新招股，更可能會調低認購價。消息未經公司證實，不過，若真係招股唔理想，中電信呢次可以話係搬起石頭砸自己的腳；自以為聰明，反被聰明誤。
其實，今次中電信上市，市場氣氛已經算唔錯，恒指由低位大幅反彈成千點，兩隻內地電訊股，中移動（941）同聯通（762），以及本地隻電訊盈科（008），亦都由低位升番1成有多，咁嘅氣氛，加上中電信上市嘅PE又唔係高，本來對佢都好有利，殊不知中電信好做唔做，響招股之時宣布大幅提高長途電話接入費，加幅驚人，高達7.5倍，重冇緩衝期，今個月就開始實施。由於大幅加費會影響電訊商IDD嘅生意，所以消息一通天，電訊股就應聲而落，成個市嘅氣氛亦都淡晒。
中電信本來有佢嘅如意算盤，就係宣布大幅加費，點都會刺激招股嘅反應，但結果係適得其反。其實，中電信「出事」傳聞就有好多個版本，包括延長招股時間、又或重新招股等，以及來自包銷團方面嘅消息，話出現技術性問題，而不得不煞車等。近來民企已經令到香港投資者冇晒信心，中電信上市由搞小動作到「出事」，印象分方面又大打折扣，中國信息產業部今次「指導」中電信加費，一如以往的缺乏透明度。中電信今次重新招股，早前借錢入票者，連利息都蝕埋，認真唔抵。
電訊股雖回落，但科技概念股就好硬淨，周三納指同噚日台灣嘅電子股都造好，帶起本港嘅概念股，較強勢而又有大成交支持的有品質國際（243）同tom.com（8001），前者升1仙；後者升3仙。
品質最近曾配股，集資作營運資金，現時市況，接貨者應不會是泛泛之輩，配股後股價表現亦不俗，消化完成後，股價有頗大機會再向高位推進。
郭兆誠