香港興業喺7月促銷愉景灣海澄湖畔二段，當時搞咗個「1001夜越洋浪漫之旅」選舉，由參加者提出同至愛最浪漫嘅拍拖勝地，結果收到一萬五千幾份表格。蘭西收到香港興業嘅刊物，提到參加者填寫嘅勝地超過二百幾個，最多人揀嘅地方係邊度？原來「遠在天邊近在眼前」，就係愉景灣嘞。可能係同大白灣水清沙幼兼一望無際有關啩！但究竟有冇擦鞋成份，就好難講。
第二位嘅巴黎，公認夠晒浪漫；但第三位就幾出人意表，竟然係泰國布吉。
至於希臘同日本，榜上有名都唔出奇，但有賭城之稱嘅美國拉斯維加斯都入選，重排第九位，喺新加坡同夏威夷之前，咁就幾奇怪。
發展商揀出五百名得獎者，送出三日兩夜免費曼谷Sukhothai或新加坡聖淘沙Beaufort六星級酒店食宿，中大獎嘅一對情侶，就有得入住蜜月套房四日三夜。但係幾時至知邊個得獎，發展商未有公布。
長實尖沙嘴旗艦物業港景峯，經已拆棚。唔少市民行經廣東道一帶，都會發現，個屋苑商場密鑼緊鼓做緊裝修。
噚日聽長實趙生講，原來個商場三層高，佔地十七萬方呎。由於位置近中港碼頭，想設計成一個類似免稅店嘅商場。
佢話，呢個項目交由全國人大香港區代表李鵬飛搞。租金先賣個關子，但就會加入啲香港地道元素。
大家都心急想知，個商場構思係點，幾時可以去行吓，趙生就話好快嘞。
物業拍賣會近來銷量多番啲。不過唔好開心住，因為賣到嘅都係細眉細眼，大部份唔到一百萬，十零二十萬就唔少。
好似利嘉閣測量師行啱啱拍賣，售出三項銀主盤。最貴係灣仔秀華商業大廈7樓A及B室，加埋逾千方呎，都只不過九十二萬。但係屯門工業中心二千五方呎銀主貨，就僅售二十五萬。九龍灣信和工商中心2樓七百幾呎重cheap，得嗰二十三萬。拍賣行可以收到幾多佣，大家心裏有數。
若果係大碼貨，好多根本賣唔出。所以，拍賣行呢期開始改變策略，專拍啲細價貨，希望「細細粒容易食」，「山大斬埋有柴」。
政府救樓市大計又傳好快公布，聽講負責嘅官員，房屋及規劃地政局局長孫明揚，近排猛搵團體食飯，就救樓市、到房協與市建局合併等，請啲團體盡量講意見，最好寫埋意見書𠻹，有啲好合作，真係畀埋意見書。
聽講市建局最近提出，市區重建，唔使一定要全部拆咗重建，有啲只要翻新就搞掂，而且重可以外判。呢個構思就係來自其中一個團體嘅意見。
至於其他機構，都係孫公諮詢嘅對象，總之多多益善。
集思廣益，可能搵到啲有用嘅措施都未定。
蘭西噚日行經尖沙嘴碼頭，畀個阿嬸截住，遞咗張紙過嚟。呢啲咁嘅宣傳單張﹙右圖﹚，每日都收十張八張，本來順手就丟掉。
點知睇到個標題寫住《理想居所？你的枷鎖！》即刻職業病發，瞄多兩眼。
嘩！裏面列出十項衰嘢，好似衝住機鐵九龍站啲樓狂數。又話死過人，又話空氣濁、交通差。
唔知邊個諗到咁嘅橋嚟彈人哋啲盤。單張最尾重括住話「善哉善哉」。