中電信（728）突然傳出要押後一周上市，有傳聞指因為認購不足需要修訂招股條款，亦有傳聞話因為中電信在招股中途，大幅調高海外致電國內IDD之接駁費，需要修訂招股書內容，因而要重新招股。
若因為認購不足而要押後，即係話連「騷哥利」都難以吸引投資者，對市場氣氛有負面影響；若因為調高收費而修訂招股書內容，則今次「騷哥利」行動反而變成捉蟲。港股受到中電信延長招股時間影響，噚日再跌119點，收報9441，成交48億元。
上聯水泥（1060）亦搞併股，今次是50合1。消息一公布，股價即跌至1仙跌無可跌水平，而且重有大條長龍沽盤等出貨，收市話就話跌33.3%，不過暫時重未用人手交易上板，因此跌勢尚未真正見底。
較早前獲基金增持勁升嘅比亞迪（1211），開始見到芬佬減持，主要基金股東FMRCorp申報於本月29日已減持83.15萬股。
近期民企股遭大手拋售，但此股未有跟隨，主要原因之一是貨源極為歸邊。不過，現時有芬佬開始減持，或多或少反映基金忍唔住想出貨。據聞此股想炒至20元才會散貨，但睇現時情況，大戶就算重整攻勢，相信亦難以完成既定目標。
TCL國際（1070）近期股價升上2.60元後，開始見阻力，噚日突然大幅下挫9.7%，收2.10元，成交亦增至5115萬元。據聞有大戶開始出貨，主要因為國內手機價格下調，令其毛利收窄。TCL將於下月中公布季度業績，屆時便可知新拓展手機業務表現如何。
阿虎