由本報舉辦的「偶像齊齊玩」已是第二十次與大家見面，今次安排fans探汪明荃和鄭少秋（秋官）這對螢幕情侶的班。當秋官知道fans為自己帶來心愛的忌廉巴夫時，笑得見牙唔見眼，與fans談笑風生之餘更冧盡fans。
為迎合不同年齡的fans，今次的「偶像齊齊玩」特別安排一次探班活動，主角是正為無綫拍攝劇集《血薦軒轅》的汪明荃（阿姐）和鄭少秋，雖然只是一次簡單輕鬆的探班活動，已足見秋官與阿姐的魅力。
當天fans參觀完電視城古裝街後，便到《血》劇的拍攝場地，靜靜觀看秋官和阿姐的演出。
阿姐的fans帶備鮮花和生果籃，雖然阿姐拍完《血》劇後，須趕去錄影無綫特備節目，而未能與fans相聚，但fans卻表示不介意。
阿姐fansAster說：「我細細個已經開始鍾意阿姐，我覺得佢真係好靚。其實屋企人知道我鍾意阿姐都好放心，因為知道一定唔會學壞。今次唔能夠同阿姐一齊玩，雖然有少少失望，但係我知道佢有嘢做，我哋都好明白，我哋當然會全力支持佢啦，其實見到佢已經好開心！」
而秋官的fans知道秋官對忌廉情有獨鍾，特地買來忌廉巴夫與秋官同享，令秋官開心不已。因劇情需要，一向演慣大俠的秋官當日卻慘變「盲俠」，fans眼見偶像要蒙上雙眼拍攝均感到心痛，秋官笑說：「係啦，要我扮盲，呢幾集收視一定大跌！」
而秋官亦不失其大俠風範，對fans有求必應，在短短的休息時間內，幫fans拍照兼簽名，逗得他們十分開心。
問秋官對今次fans探班的感受，他說：「梗係開心啦，有嘢食就最開心！」
採訪：羅慧敏 攝影：仇志德