中電信真多動作，傳國際認購唔足額可能調低認購價，中移動（941）多得佢唔少，散50仙。先幾日，中電信忽然將長途電話接駁費調高7倍幾，已搞到啲電訊股一鑊泡。
中移動Call輪好幾隻就咁散15%以上，Put輪自然意氣風發。𠵱家至追中移動Put輪，唔係太化算，正股做19.15元，可能最多軟些少，昨日最低19元，可能有機會喺呢個位守得住，價低揸中移動Call輪比較着數，例如限價以14仙買入9532，以13仙買入9526。
中電信傳聞整散中移動，亦整散個市。恒指唔見119點，冇直接關係嘅藍籌，本來好地地，亦受池魚之殃，例如長實（001），最高做53元，有75仙進帳，一度掟到落51元，高低位2元，最後收51.75元，唔見50仙，未致太肉酸。
長實51元係兩個禮拜前彈上去嘅起步位，昨日試呢個位後，有望重建升軌，長實Call輪不妨搵一兩件嚟小炒。孖輪9515同9517係易買易賣嘅主角，9517做36仙，平過9515達2.5仙，抵買啲。滙豐（005）收85元，跌75仙，有機會守得穩，否則喺84元亦守得住。可以諗吓隻Call輪9395，明年1月到期，現價27仙，溢價7.3%，槓桿率31.5倍。打穩陣波，喺23仙上車。
章盛