噚日嘅創意工業研討會，八方覺得導演高志森嘅發言最有啟發性。佢講番八十年代初出道，加入當時由麥嘉、黃百鳴等成立嘅新藝城做小編劇，一入到間專門用嚟度橋嘅「奮鬥房」就嚇咗一跳，因為牆上掛住一幅對聯「長江後浪冚前浪，一代新人葬舊人」，比起原本嘅「推前浪」同「勝舊人」激好多。
高大導演由此悟出，創意唔係請客食飯，唔使同人客氣。八方都記得當年由高志森導演嘅《開心鬼》票房勁收，唔知係唔係因為睇咗呢副對聯。
高志森又提出「創意元素論」中，所謂創意其實係將不同元素重新組合。
講得好似好玄，高志森一舉實例大家就明晒：傳真機即係電話加影印機，許氏兄弟嘅《最佳拍檔》，原來係由西片《占士邦００７》加《午夜狂奔》，再加莎士比亞名劇《馴悍記》，佩服！佩服！
當年新藝城「奮鬥房」有一幅對聯嚇親高志森：
一代新人葬舊人
長江後浪冚前浪
傳真︰2623-9278
電郵︰