經濟唔好，大家都諗盡辦法去減少養車開支，買部全新1300cc小車代步，閒閒地都話要十萬八萬；退而求其次，買部1500cc級二手家庭房車其實都係好主意。年份新嘅日本二手1500cc自動波家庭車邊部最平？豐田Corolla、本田Civic同三菱Lancer起碼要7萬5以上先有交易、日產Sunny至少都要5萬幾、萬事得323只需5萬就有交易，夠抵玩未？梗係未啦！事關福特Laser隨時比323重要再平多5千，即係2000年車大約4萬5就有交易喇！
323同Laser其實係同一部車，福特持有萬事得車廠三分一股權，而福特亦一向都有在萬事得嘅生產線造車，而323與Laser嘅姊妹關係亦已維持多年；除此之外，兩者嘅新車售價其實無乜分別，但二手價就有些許差別，呢個可能係與牌子有關。
無論係底盤、引擎及波箱，兩者其實無大分別，但外形設計及設備配搭就有出入；例如1999年同2000年落地嘅Laser，有合金軨、ABS、雙氣袋及單碟CD音響等配備，但同期嘅323卻有多項設備配搭選擇。後來，廠方響2001年為Laser推出Facelifted新版，不但加上天窗，就連鬼面罩、車廂布局等等都略作修改，從而令新車更增添有一份競爭力。
Laser嘅車廂空間亦都好充裕，行車又穩定，安全度又高；但可惜部份放盤十分粗用，行李箱經常用嚟載貨或皮位打理較差，兩年車可能已經好殘舊，買家應避免選購呢類放盤，皆因市場上企理嘅放盤亦不少呢。
資料提供：Auto22.com