唯冠國際（334）業績果然一如所料，由盈轉虧，重要蝕成7750萬元咁多，難怪公布業績前股價急跌，但壞消息出咗之後，股價出現強力反彈，但經紀陳就話唔睇好，覺得升勢會好短暫。
唯冠在本周一公布業績前，股價突然由50仙樓上急跌，最低見過30仙，但業績公布後，股價大幅反彈，噚日最高38.5仙，收36.5仙，升4.3%，成交金額373萬元。
經紀陳話，唯冠業績咁差，主要係受撇帳所拖累，股價反彈嘅表面理由，就係壞消息已經出晒，但真正問題係公司幾時先至否極泰來？
若以陰謀論去睇，唯冠公布業績前夕，股價先至勁挫，反映揸重貨嘅投資者，可能真係好遲先知咁大件事。在咁短時間內，加上市況欠佳，冇人承接，佢哋實在冇可能出晒貨，唔排除現時股價反彈，係炒高散貨而已。如果呢個陰謀論成立，隻股嘅升勢難以長久。
慕容小初