好耐冇見中港森，自從佢由揸中港貨櫃轉做走原宿水貨後，成個Look轉晒，以前石磨藍牛仔褲襯地盤Boots，今日已變成功能褲襯關刀，成身都係DoubleName或別注，眨眼已變成原宿SnapShot人辦。最近另一大轉變，原來中港森坐嚫飛機出Trip都坐商務位，臨上機前可到商務休息室歎番陣，威水過啲大公司老闆（蓋茨都係坐經濟位咋）。見佢個款愈嚟愈豪，唔怪得咁多細路想入行走水貨。中港森解釋：「你估我真係有錢冇地方使？其實都係被迫坐商務客位。商務位個寄倉Kilo(即kilogram）高成倍，方便我哋一次過帶晒啲貨返嚟，重有𠵱家好多信用卡啲積分都可當飛行哩數使，我個商務位咪係用飛行哩數Upgrade囉。」
講開信用卡積分變哩數，原來𠵱家好多水貨佬最鍾意出花旗銀行同國泰嗰張聯營卡，去到日本時全部用卡掃貨，佢哋碌啲額唔同常人，去一兩次已換得張來回日本機票，學中港森咁Upgrade埋商務位增加寄倉重量，年中可慳唔少，真正做到開源節流。中港森有時重學袁人祥咁結美相伴過日本，唔好以為去玩，只不過多一個人，多一個寄倉額方便帶多啲貨咁解。中港森：「水貨佬好多時表面風光，內裏其實捱得好辛苦，啲人重以為我由坐貨櫃車變成坐商務客位梗係好掂，實屬美麗的誤會。」
主持人：大食Jack
八卦熱報：