馮仁昭耐不耐都會去附庸風雅，聽吓歌劇同音樂會咁。前晚文化中心有場傅聰鋼琴三部曲之「獨對蕭邦」演奏會，吸引咗唔少名人捧場。
一向鍾意聽演奏會嘅「小超人」李澤鉅老婆王富信，亦喺保鑣護駕下出現，班保鑣重打開雨遮幫佢擋鏡頭。平時王富信雖然對傳媒唔瞅唔睬，但係都不至於會發脾氣，但係可能前晚落雨，架車又未嚟接佢，所以王富信好𤷪𤺧。佢面黑黑咁用英語問個保鑣架車喺邊，重一手搶咗保鑣手上把遮，自己遮自己，唔使個保鑣幫手擋咁話。
而電訊盈科副主席張永霖同東風衞星電視副總經理黃寶慧呢一pair亦有去，雖然黃寶慧一見記者顯得有啲尷尬，但係仍然好有禮貌咁話：「我以前做記者嗰陣，曾經訪問過傅聰，所以咪嚟捧場囉！」另外，信興集團主席蒙民偉同女友王培芬亦有嚟，不過佢哋都相當避忌，重前後腳出現。
楊采妮復出娛樂圈，佢噚日去米埔出席第十屆自然基金「米埔環保行」慈善步行活動。
有報道指楊采妮財政出現問題，但佢就話：「呢件事一直都畀人誇張咗，件事亦已經過咗，總之𠵱家冇問題。」楊采妮重話未打算結婚，佢話：「多謝大家關心，我同男朋友好好。」對於有女星嘅裸照被刊登，佢就話：「藝人係公眾人物，有啲人會抱住清者自清嘅態度，我覺得大家應該互相尊重。」
黃伊汶上周末到日本「MicaMusicLaboratory」學唱歌同跳舞，佢預計會逗留兩個月，環球唱片副總裁SimonChu亦有陪佢去。黃伊汶日前話：「我帶咗啲Demo帶畀先生聽，另外我會學hip-hop舞。」黃伊汶重話要節制吓，佢話：「Simon噚日已經走咗，佢喺度時我可以大魚大肉，𠵱家就要慳慳哋。」
薛家燕（好姨）早前應出版社邀請，以佢個嘜頭推出漫畫，相信唔少小fans捧場。好姨重自掏腰包攞出四千五百元做獎學金，獎勵填色比賽嘅勝出者。
好姨個大女石祐珊去咗美國讀大學，佢話：「阿女話嗰邊天氣開始凍，叫我寄張羽絨被過去，但係我就叫佢自己喺嗰邊買。」
周杰倫明年一月十一日，喺新加坡舉行一場演唱會，反應好到離晒譜。當地報章報道啲飛喺五日內賣清光，有人重即刻炒黃牛飛，由約六百五十蚊港幣炒到二千蚊，主辦單位就笑到見牙唔見眼，重決定加多一場。
下月十三日至十五日，周杰倫喺香港紅館舉行嘅個唱，噚日正式畀信用卡用戶優先訂飛，聽聞條訂票熱線俾人打爆咁滯，啲人成日都話經濟差，但事實證明好嘢總有捧場客！