「戴表要帶英納格，又襟又準又夠格。」這句當年紅極一時的手表宣傳語，曾經家傳戶曉。但時移世易，這些過氣名牌既已不復當年勇，甚至被迫黯然下台，幸好在那時冷時熱的復古風下，有着一班對它們不離不棄的擁護者。如果閣下也是一分子，那便有福了，皆因有表行把這些絕版名牌表，以低至四折價錢出售，今次搵來後生仔阿剔揀番幾款心水之選，即管又睇吓佢嘅品味同唔同你！
記者：黃婉冰
攝影：陳陶鈞
ImageBoy：阿剔
要數亨得利表行歷史，就要數回1874年，當時表行由三位老闆合資經營，後來1890年，其中一位老闆自資開了第一間亨得利，而上海街這間已是第三代經營。「原本一共有五間亨得利，但後來中英談判，老闆對香港前景無信心，都唔記得係八幾年，老闆一次過關閉四間舖，只係留番上海街呢一間，四間表行所有存貨一次過封晒箱，到最近先得閒開箱再賣，點知遇着經濟不景，咁咪平價出售囉。」表行負責人麥小姐說。她表示這些款式全都是六、七十年代最出名的表廠出品，全部都是絕版款式，真正是賣一隻少一隻。
美度白表面水晶字$800（左）
銀表面礦石字$750（右）
在六、七十年代堪稱一代潛水表王的美度表，表身用密封式開面蓋設計，令表肉防水性能更高，全自動唔使日日上鏈。款式分別有白色表面加水晶字同銀表面礦石字兩款，前者在燈光照射下與鑽石真的幾可亂真。
阿剔點睇：大表面好適合現時潮流，款式不會太過老土，同早前有一隻swatch嘅表好相似，礦石款式無咁誇張。
綺年華全自動布紋電視表$3,980
自動表係由綺年華表廠發明，表肉內藏五粒波子來推動飛鉈，戴上手後只要輕微郁動都可以將飛鉈推動，唔使自己上鏈，最適合大頭蝦，加上灰色布紋同當年最興嘅電視形大表面，想話唔係古董表都無人信。
阿剔點睇：灰色布紋同正方形𠵱家都好少見，表帶同表肉好襯，睇落好Cool，好Smart。
黑色小秒針粗兵字表$500
本來係法國出品嘅羅頓表曾叱咤一時，後被收購先變成瑞士表，表廠早就執笠，所有表已成絕版，包括這款上鏈黑表面加夜光粗兵字（即字體整齊），成隻表最特別嘅係下面有一個小秒針，日期位在一字同二字之間，較罕有，後生仔戴都唔覺老餅。
阿剔點睇：黑色表面Casual得來又夠Cool，數字字體好型，加上𠵱家都好興表面加個小秒針，款式好摩登。
利華達中、英文日曆表$780(前)
雷達活動寶鉈$1,200(後)
以前中國人英文水平低，所以瑞士表廠特別將日期加入中文字，呢款利華達自動表就係其中之一，一隻表有齊中英對照，夠晒煞食。呢隻雷達活動表款式同利華達差唔多，但只得英文日曆，在十二點位置下面嘅寶鉈隨住隻手郁動會360o轉，幾盞鬼。
阿剔點睇：利華達隻表好有60年代Feel，懷舊味重，有埋中文日期最特別。雷達表條表帶較難襯衫，換過另一條三格鋼帶睇落無咁成熟，Casual得來又斯文。
日字形薄身凸字表$580
長方形表總會畀人一種斯文感覺，呢款羅頓日字形白表面款式亦唔例外，表面設計清簡，單數數字全以凸箭嘴取代，手工精細，表肉較薄，戴起來夠貼手，另有黑表面，感覺完全唔同。
阿剔點睇：長方形望落好斯文，我覺得最好用來返工，望落好高貴得體。
依波路玫瑰紅情侶表$1,480（男女同價）
自動全鋼依波路情侶表設計簡單，表面用內放大鏡將日曆放大，表面平滑，就算戴得幾粗都唔怕刮花，玫瑰紅之外重有白色，但顏色較為大路。
英納格方形織帶表$680-$980
英納格呢款銀表帶加方形表面，係六十年代尾到七十年代初最時興嘅款式，以前一隻要賣千多二千蚊，織帶包白金款式已絕迹，難怪二十年後依然大受歡迎。
依度手繪鈪表
有蓋$1,380
無蓋$1,280
手鈪表之中，以呢款有蓋，用人手繪上圖案嘅最特別，手鈪式設計可隨意調校大細，隻隻都由人手逐筆逐筆繪畫，每隻各有特色，戴出街都唔怕同人撞表，但記得要日日上鏈。
綺年華走珠女裝表
$2,600-$3,300
綺年華表肉嘅包金厚度比其他牌子嘅表多六倍，所以表身唔易甩色同走樣，同樣以五粒珠全自動運行，夠晒方便。方形圓表面同圓表面兩款中，前者較為特別，其中有牙花圈款最夠懷舊Feel又典雅。
金銀斗零表各$850
一套《花樣年華》搞到阿媽年代嘅斗零表可以重出江湖，呢兩款都係六十年代最興嘅金色款，表面玻璃有精細切割花紋，款式絕不簡單。
一般來說，以前嘅表都會用上鏈和自動飛鉈兩種運行原理，前者要上鏈令齒輪運行，後者係由一個軸心帶動鉈形鋁片，呢塊鋁片就叫做「飛鉈」，「飛鉈」會在郁動時連帶齒輪運行，將隻表戴上手，只要手部郁動就可以帶動飛鉈，而自動表就係靠呢個原理運行。
店名：亨得利
電話：23889125
地址：上海街358號地下(油麻地地鐵站B2出口)