行街鄭為咗搵食，早已北上神州，比松司長叫人北上，早咗十年八年。佢𠵱家以上海為基地，經常叫馬主H上去搵佢。好嘞，馬主H為咗追上潮流，卒之以港燦身份，走去上海見識見識。馬主H舊時跟過張亨利學跳舞，張師傅最鍾意講：「舊時上海百樂門，舊時上海跑馬跑狗，舊時上海杜月笙嘅霞飛路大宅……」聽到馬主H為之神往。張師傅仙遊已久，佢在上海讀暨南大學年代，的確威猛繁華過香港好多。
到咗上海，第一件事就係食。行街鄭帶馬主H去「吉士餐廳」食上海菜，如元蹄、乾菜黃魚、鮑魚雞炖湯、清炒蝦仁，嘩，馬主H話精采到痹，香港未曾見過，只可惜餐廳門口永遠排隊，訂咗位亦可能俾人飛起，馬主H等人坐的士去到吉士門口，已見塞滿人，無法入內，只見行街鄭指吓鼻哥，講幾句閒話，佢一早訂咗嘅枱先至搶到番嚟。但係餐廳地下好擠逼，坐到好唔舒服兼夾上海佬鍾意開暖氣，真係食到大汗叠細汗，如果唔係啲食物精采，馬主H一早離枱鬆人。
馬主H問行街鄭：「聽講新吉士、小南國亦好正喎，會唔會舒服過呢度？」行街鄭話：「信我啦，新吉士、小南國始終差一皮，吉士係最好。」「食完就去巴閉酒吧PaulnerBrauhaus，先去舊店，再去新天地嘅新店，又係逼爆，行街鄭使出指鼻哥絕招，哈又得喎，我哋通行無阻，搵到靚位㖭，呢兩間吧咁好生意，應該賺到盤滿缽滿。」馬主H後來問賓架C：「邊個係老細？」賓架C話：「台灣廠家陳飛龍，佢嘅副業（酒吧）重賺得多過正業！」