荷李活玉女雲露娜維達（WinonaRyder）雖然前日係佢三十一歲生日，但係照樣着到送殯咁上庭。喺第二日嘅聆訊裏面，控方將百貨公司嘅閉路電視錄影帶呈堂，餅帶成個半鐘咁長，有一段影佢入試身室試帽，出番嚟頂帽就唔見咗，兼且佢拎住個袋重脹卜卜㖭，而片段最後影住雲露娜想走出百貨公司，然後俾三個保安「的」番轉頭。
保安經理作供時話佢哋搵到雲露娜剪落嚟嘅四個防盜標籤，陪審團亦都睇過剪咗標籤嘅貨品，不過辯方律師就話今次嘅錄影帶同之前嘅版本有矛盾，而雲露娜住喺三藩市嘅父母亦有聽審支持愛女。
其實呢單案搞咗差唔多成年，雲露娜上年底被捕，佢同阿當桑迪拿（AdamSandler）主演嘅喜劇《愛你有錢途》今年六月都喺美國上映，件案都未審完，最近已經出咗美版DVD㖭啦。
我大口羅拉已經睇咗《愛你有錢途》嘅DVD，雲露娜喺套片度飾演一個為達目的不擇手段嘅女記者，成日都着低V騷胸好性感，佢為咗親近由阿當扮演嘅有錢佬，就出盡法寶埋身，過程都幾鬼抵死。
雲露娜最初喺街扮晒俾人搶嘢同非禮，等阿當去救佢。雲露娜又為咗偷拍阿當嘅生活，將個偷拍器收埋喺自己乳溝入面，極之香豔。不過佢最後有啲良知，因為電視台刻意失實報道爭收視，所以佢炒老細魷魚！