庫務局副局長應耀康噚日同一班記者行家開預算案工作坊，話BudgetSeason（預算季節）已經開始，又係時候同家人講拜拜，因為要埋頭做預算，同各局長展開埋身擊，逐條數計。
講開家人，Stanley（應耀康洋名）原來一副外父相，佢形容自己人到中年，但係兩個囡囡重係要玩「拉牛牛」嘅年齡，七歲嘅大囡孭住喺背脊，四歲嘅細囡就抱在身前，老婆都驚佢會仆親。
最慘係財赤搞極都未搞掂，幾難幾悶都要頂硬上，結果Stanley呢排無法朝朝陪兩個女串英文字，兩個女噚日連「早晨」都唔同佢講，搞到Stanley非常傷心。
Stanley噚日提出咗一個令人非常頭痛嘅概念，叫做baselineplus，話係阿松減1.8%開支嘅基數，但到底呢個數點計出嚟，佢話要記者去庫務局做番一個暑假先講得明。八方都想去，不過驚到時見到「國家機密」，會忍唔住洩漏出去。
傳真︰2623-9278
電郵︰