昨日《東周刊》刊登了某女星被擄劫及強迫拍下的慘情裸照，遭香港記者協會及一眾演藝人對此強烈譴責，劉鑾雄更加呼籲政府要對此事高度注意，因為事件變相鼓勵不法分子去犯罪。
最新一期《東周刊》以某知名女星被虐的半裸照做封面，相中女星垂頭哭泣，明顯是在不自願下被拍下裸照。該女星近年來拍片量已大大減少，與男友感情則反覆不定。
有關該女星被人強迫拍下裸照曾傳出兩個版本，其中一個是某女星因介入一段三角戀，所以被某富商找人「教訓」，有女星被拍下裸照和虐打。事後該女星報警，及後女星為怕再受傷害而退出三角戀。
另一個版本是某電影公司老闆曾經找該女星拍片，她口頭上答應接拍，但後來因要接另一公司的戲，結果辭演，因而開罪了有江湖勢力的電影公司老闆，結果該女星被幾名大漢擄上車，拍裸照和虐打。
城中富豪劉鑾雄（大劉）昨日認為此事已影響到香港整體市民的安危，不止是娛樂圈的事，並呼籲政府要高度關注今次事件。
劉鑾雄昨日在電話中說：「我唔知呢個女星係邊個，係邊個都唔重要，但係香港政府唔可以容許有啲不法商人利用法律罅去做埋啲咁嘅嘢。呢啲相十萬八萬就買得到，如果咁都得嘅話，香港有啲不法或老實商人嘅太太或者個女，好多人都有興趣出五百萬，或者一千萬去徵求佢哋嘅裸照，咁咪即係變相鼓勵啲不法分子犯罪，博受害人唔報警，隔幾個月再將啲相賣畀啲周刊登？」
大劉續說：「希望有關當局唔好因為出事嘅唔係自己嘅親友而置諸不理，咁樣無法無天嘅事，可以成日發生，重成世界嘅？政府唔做嘢，遲啲香港咪演變成好似中東地方咁，油王都要交保護費畀阿蓋德組織，嚟交換自己、公司或者家人嘅安全？」
大劉亦想向政府部份官員作一些提點，他說：「另外我想呼籲部份官員要小心，喺有啲活動中接觸到不法商人之後，可能會矇查查俾人擺咗上枱都唔知，或者令到自己成為被勒
梁朝偉昨日出席尖沙嘴有線的活動，記者問他有沒有看女星裸照做封面的雜誌，他說：「望過吓，呢啲嘢冇乜好回應，不過登啲咁嘅相係冇乜道德。」
毛舜筠昨日在商台慨歎地說：「世風日下，做藝人真係慘，如果事主真係有呢件事發生，就唔好再渲染。我同事主曾經合作過，亦都十分佩服佢，佢好叻女同埋成熟咗好多，因為佢近排咁多新聞，感情一有問題即刻被渲染，但係佢處理得唔錯，大家放過佢啦。」
薛家燕則透過電話說：「我唔知輯相點嚟，但作為當事人，受害已經好慘，𠵱家啲相重俾人攞嚟登，如果為咗增加銷量，真係唔道德，其實好多正面新聞可以報道，傳媒咁做真係好無陰功。我奉勸藝人一旦出入夜店或者交朋結友，佢哋都要小心啲，以防萬一。」
至於《東周刊》所屬的新傳媒，其營運總裁TerryChan昨日對演藝界和香港記者協會強烈譴責《東周刊》，他說：「現階段我未了解清楚事件，所以暫時不會回應。」
記者昨日致電警察公共關係科，問警方可會主動插手事件，發言人說：「就一般情況來講，如果件事過咗好耐，要跟進都相當困難，單憑一張相就話呢樣嗰樣，未必夠證據。有人報警，我哋會跟進，如果事主唔追究，一般唔會主動跟進。」