樓價係咁跌，都有人可以短線轉手賺錢，認真高手。牛頭角得寶花園啱啱就有一單。利嘉閣淘大分行經理區天生對蘭西講，呢個單位係A座低層2室，業主今年二月用68萬元買入，畀多約五萬將單位大事裝修，原本諗住自己住，後嚟改為同屋企人住，但地方唔夠大，所以再搵過屋。於是，就以82萬元賣咗畀個自置客，淨賺6萬至8萬。高市價約一成，因為附連裝修，買家唔想再籌措一筆裝修費，所以高價都肯買。
區天生又透露，得寶花園𠵱家有一個炒家盤，係C座中低層397呎單位，已經傾到尾聲，估計成交價80萬元左右，炒家都可淨賺10萬元。
原來得寶同隔籬嘅淘大花園，都有幾個炒家不斷物色售價100萬元以下、低市價一成半嘅筍盤，然後翻新轉手圖利。不過，佢哋手上嘅貨都係兩三件，重係賣一件至買一件。佢哋吼得寶同淘大，都係貪個盤多上車客入市，容易甩手。
中原黃金鳳話，大埔墟廣福道九十四至九十八號三個相連舖，各一千呎，啱啱租出，最平呎租三十七蚊，最貴每呎四十五蚊，租金維持喺九七年嘅高水平。
行內人士同蘭西講，由於嗰區舖位炒賣活動唔活躍，客源穩定，所以業主態度企硬，兩年前，同類舖位放租叫價都係每呎四十至五十蚊。
啱啱租出嘅廣福道九十六同九十八號舖，一直由東亞銀行租用，𠵱家租咗畀麵包同家品公司，都係三十年嚟第一次！
經濟環境差，發展商今時今日賣樓都幾頭痛，賣樓之前要吸引市民，宣傳曝光工夫自然唔少得。好似近排密集式舉行促銷活動嘅嘉華地產，上個禮拜五，帶傳媒睇完嘉多利豪園嘅現樓兼會所，當日市場已派發三個單位價目表，表上印有兩項付款計劃，分別為五個巴仙首期同埋頭三年彈性供款計劃。第二日普遍報章地產版都有報道呢段新聞。點知，噚日嘉華又搞個記者會，內容同價目表嘅無大分別。
話明新聞界，梗係要「新」唔要「舊」，搞到記者們抓穿頭，唔知點交差？再三追問下，原來最新嘅係個計劃由滙豐銀行承造按揭喎，蘭西真係無言以對嘞。
太平協和噚日搞記招，蘭西見到中原老闆施永青好似好忙咁趕到嚟，打探之下，原來佢朝早去深圳，做深圳百仕達花園三期驗樓團成員。
驗樓團共有九人，還包括港人熟悉嘅設計師高文安。
驗樓完畢，樓盤下個月十八號入伙。百仕達集團梗係順勢推盤，兼且會送百分之五樓價回贈，重搞免費睇樓團，睇樓人士可以免費使用會所設施同高爾夫球場。果然高招。
可靠消息人士對蘭西講，西九龍填海區發展為綜合文娛藝術區嘅方案，政府已經有定案，就係會採用新地贊助，由FosterandPartner設計嘅計劃。
不過，近期政府財赤嚴重，唔想畀外界抦，最理想就係一個仙都唔使出，所以就重要計計點砌掂條數，到𠵱家未定到商業同其他用途嘅比例。
Foster嘅設計，呢個作品以巨型天篷為焦點，連綿1.3公里長，下面設有演奏廳、展覽館、博物館、表演場地，附近重有商舖、餐廳同酒店。當中評審團估計成個發展建築費要240億。
聽講個天篷建造費佔項目三巴仙，都好重皮。
發展商開盤，梗係想一Q清袋，免得為貨尾而煩惱。蘭西收到料，有啲好耐冇盤推嘅發展商，有見市場由賣家主導變為買家主導，唔可以用高峯期嗰套手法賣樓，但因為有盤要開，迫住要四圍打探軍情，睇吓有乜好橋，可以將個新盤搞到有聲有色。當然，最重要係可以清貨，同老闆有得交代。
𠵱家市況咁差，就算係樓神樓聖，都未必夠膽拍心口保證，可以賣得清全部單位。過往有唔少盤賣衰咗個頭，貨尾擺咗喺度唔知點收科。淡市搵必勝策略，要靠高人指點，或者碰吓運氣。
寫字樓業主為求租出單位，劈價最見效。市傳銅鑼灣萬國寶通中心一個低層近七千呎單位，最近以呎租唔使五蚊租出，聽到都心寒。但係樓上單位呎租超過十蚊，差別好大。
市場人士話，間唔中有啲超低呎租出現，都係跌過龍嘅個案，幸好只係偶一為之。好似西環成基商業大廈嘅三個八呎租，事隔差唔多一年，𠵱家都未有咁低嘅造價。
蘭西
電郵地址：