梁展文CM以前喺屋宇署，已經出咗名做嘢搏命、有諗頭，估唔到執掌房屋署之後，表現更勇，連頂頭老闆孫明揚都讚佢心口有個「勇」字。
話說CM日前同八方等一眾行家講，要大刀闊斧整頓房署嘅工作文化，面對傳媒同社會嘅批評時，要有問責制嘅承擔精神，所以勒令佢班下屬，每有傳媒查詢，要兩小時內作初步回應佢，四十八小時內搞掂個問題；至於政府要削減百分之一點八資源，CM更寫包單話「得、得、得、得」。
如此豪言壯語，連佢老頂孫公都忍唔住大讚佢好嘢，孫公噚日同八方話：「我只可以話佢好勇敢，四十八小時解決問題，我自己都唔會承諾，只會作為工作目標；你知啦！四十八小時，眨兩眨，瞓醒兩覺就冇咗。」孫公都話要削減百分之一點八資源唔難：「好似零用錢咁，冇得用嘅咪飲少支可樂囉！例如部門好多影印嘅，咪影少啲，用多啲電腦。」
不過，CM咁勇，佢班下屬就好大壓力，八方聽講房署新聞組班兄弟姊妹，由問責制一開始，日日晨早五點半起身，六點半返到office，睇晒各大報章，八點鐘向佢老人家滙報，唔怪得佢「誇啦啦」，咁把炮。
傳真︰2623-9278
電郵︰