恒指再跌74點，電訊股個勢較弱，聯通（762）跌3.9%，中移動（941）唔見2.7%，電盈（008）回落2.6%。
聯通由前禮拜一起，連升8日，由4.15元殺上最高5.60元，幅度高達35%，升得急，調整一吓好應該，𠵱家4.90元，吼住跌多一兩日，例如見4.60-4.70元左右，趁低博Call輪。聯通Call輪以9512比較容易買賣，明年4月到期，現價29.5仙，溢價23.4%，槓桿率16.6倍，咁嘅數據當然唔靚，唔適宜攞嚟揸，只係適宜間中見啱價之時攞嚟炒，若見22仙，則細注買入，反彈即沽。呢件輪波幅好勁，先一排，10日之內幾乎升5倍，然後4日之內大散一半。
中移動現價19.65元，睇吓有冇機會回落到19元。見呢個位，相信會有支持，到時執些少相關Call輪博反彈。
中移動Call輪較聯通Call輪活躍，正路對象係9526同9532，兩件都係明年3月到期，每日都有幾十球易手，數據亦相差好少，溢價12%上下，槓桿率12倍左右，大概係正股每郁動2.5%，兩隻輪各郁10%。想更加刺激則揀9437。
至於電盈見低位想博反彈，最好直接買正股，有成交嘅Call輪9417超過6成溢價，買唔落手。
章盛