美國消費信心跌至9年以來新低，周二晚美股杜指先跌後回穩，但港股噚日持續下跌，恒指收市報9560，跌74點，成交只有47億元。
恒指跌幅唔大，主要市場憧憬美國將減息。不過，美國即使減息，香港受惠唔多，因為香港銀行似乎唔想將存款息口降至零或以下，在不減存款利率的情況下，銀行自然唔會調低優惠利率，以免息差收窄拖低盈利。
市場游資唔多，投資意欲又低，無息派嘅股份差唔多冇人吼，因此最近招股嘅大型公司如中電信（728）等都以派高息招徠，中移動（941）、中國聯通（726）及電盈（008）為留住投資者，都大聲疾呼話會派息。此外，連市場冇諗過會派息嘅創業板公司，最近亦想以派息來頂價，其中一隻係金衛醫療（8180），最近市場傳出公司可能會提早派息，以吸引投資者捧場。不過消息傳出後，噚日股價依然下跌，毫無作用。
黑客話，上市公司除非真係錢多，否則點會輕言派息，就算有錢都要留番來過冬啦，因此派息傳聞唔可以盡信，就算有得派，相信只會係象徵式，唔會有刺激。從金衛走勢來看，好似有人想走貨，現價入市搶貨，隨時會接火棒。
超大現代（682）復牌，公司認有附屬公司業績未審核，引起投資者擔心，股價急挫23%，收1.60元。不過超大可以復牌，斷估唔會好似歐亞（932）咁嚴重，但民企投資氣氛差，有貨要趁反彈鬆人。
另一隻民企浩倫農科（1073）就醒神好多，近期股價在接近0.60元似見底，公司公布完業績後大派紅股，吸引炒家入市，噚日逆市升16%，睇嚟可以去多一轉，大戶才散貨。
阿虎