台灣人氣組合F4，成員之一嘅周渝民（仔仔）最近推出咗一本名為《仔仔．流浪夢》嘅寫真集。
仔仔喺寫真集入面可謂施展渾身解數，既玩濕身，又用自己着過嘅孖煙囱笠住個頭，重拎住個玩具結他扮自彈自唱，好鬼搞笑，加埋仔仔嘅憂鬱樣，肯定令唔少女fans流晒口水，人人都想買本返屋企珍藏。
此外，仔仔日前喺台灣出席電視節目《惡童探險記》，嗰集咁啱介紹泰國金剛眼鏡蛇，製作單位特別安排咗兩條兩米長嘅大蟒蛇嚟搞氣氛，啲嘉賓都嚇得起晒「雞皮」，惟獨仔仔好勇敢，重應記者要求將條蛇披咗上身影相。
仔仔好得戚咁話：「大蟒蛇很溫馴。」習慣被fans苦纏嘅仔仔，又點會驚俾蛇纏吖！
有線電視噚日喺尖沙嘴舉行「2003有線娛樂新登場」記者會，介紹有線下年推出嘅新節目。有線安排咗娛樂台唔同節目嘅主持上台，三個着得好性感嘅CATGirl更上台載歌載舞。雖然佢哋表演落力，不過佢哋知名度唔高，所以就算佢哋幾努力去跳舞，台下反應都只係一般，再加埋同場嘅梁朝偉噚日成為新聞人物，啲貓女點夠佢揮！
謝霆鋒同陳小春係張栢芝嘅新舊男友，佢哋日前喺羅文喪禮狹路相逢，不過，霆鋒一見小春出現靈堂就即刻急急腳走。噚日小春喺港台就話：「人哋走，唔一定同我有關，唔好諗得咁核突啦，其實當日我都見唔到佢。」至於有途人大叫霆鋒做「死監躉、仆×」，小春就話：「假設我係佢，我都會唔舒服，我自己都試過喺街俾人粗口問候啦！」
羅文設靈嗰晚，英皇老闆楊受成同鄧光榮、黃霑等去咗銅鑼灣欣葉消夜，咁啱黎小田載住佢位靚女新歡經過。馮仁昭都覺得個女仔好面善，但一時又諗唔出佢個名，結果經友人提醒，就諗起嗰個女仔係曾經參加過亞視女優選拔賽，有「翻版郭金」之稱嘅吳鎧彤。佢之前重四圍同人講唔入娛樂圈，準備去新西蘭讀書，原來佢邊度都冇去，只係做咗黎小田個好朋友。
那英嘅最新國語專輯《如今……》將會喺下星期推出，大碟主打歌《愛上你等於愛上寂寞》嘅MV更意識大膽。兩個男女主角喺嚴寒嘅哈爾濱拍攝一場戶外做愛場面，連那英都擔心唔出得街。不過，唱片公司為配合唔同地方嘅底線，已經分別剪出五個唔同版本。連MV都去到咁盡，莫非那英想吸納多啲成年Fans？