港股近期悶到暈，但噚日仍有4隻新股招股上市。不過，向來熱愛向客戶推銷新股嘅靚女經紀，竟然叫小初慳番啖氣，佢話今時今日嘅環境，連渣打銀行（2888）同中國電信（728）都難令市民提起興趣，何況係細價股同埋創業板股。
靚女重話，呢類股份在本地股市嘅集資能力，大家應該心裏有數，若然唔係私人派對，就通常係借錢搭夠，所以不如食少多覺瞓。
今時今日，除非真係迫不得已，炒家都唔會做嘢。不過，搞緊供股嘅新世紀（234），噚日除權，股價就升咗9%，收42.5仙。如果唔係幕後想股東參與供股，相信唔會有咁好表現。
新世紀今次2供1供股集資，供股價0.30元，發行2.77億股，集資8310萬元。集資金額唔算細，當然想多些人參與。老闆話就話係星洲人，但香港揸fit人與唔少本地放貸人相熟，所以實在唔難理解，點解後者持有嘅證券行，會頻頻掛牌買賣。
慕容小初