做明星難，不過做明星嘅屋企人重難。萬人迷木村拓哉嘅二十三歲細佬木村俊作，早排首次接受日本雜誌《周刊朝日》訪問，重狂數對阿哥嘅不滿。
俊作覺得啲人一直只知道佢係「木村拓哉細佬」，其實佢同阿哥完全唔同，係一個獨立嘅個體喎。查實身高一米八嘅俊作，個樣唔多似木村，而且大隻好多，事關佢係日本體育大學嘅美式足球部選手。俊作話做木村嘅家人都好煩，佢老竇成日都俾人話「有木村拓哉呢個仔唔使愁」，但係佢話屋企其實唔使靠阿哥養。俊作亦講到明話對藝能界一啲興趣都冇，今年初已經同朋友搞咗間時裝公司設計T恤，學人創業喎。
俊作喺訪問度大發牢騷，不過睇嚟木村都好少理，仍然同SMAP嘅成員努力開工，好似最近就喺節目入面搓吓飯糰咁！