臨近期指結算，正在招股嘅中電信（728）突然發難，話要將香港致電國內IDD接駁費大幅增加7至8倍，令到電訊股大跌，拖累恒指大跌219點，收報9634。不過唔知係咪因為羅文出殯，因此沽貨嘅人又唔算好多，成交只得46.35億元。
據聞，中電信認購反應比預期差，國際配售部份至今尚未獲足額認購。唔知中電信係咪想沖喜，以及顯示一吓自己嘅影響力，一聲話加接駁費就加，顯示議價能力夠晒強，藉以吸引投資者。結果電盈（008）跌近5%，收報1.15元，以IDD業務為主的城市電訊（1137）更大跌16%，收報1.31元，而不受今次加費影響嘅中移動（941）亦挫3.6%，收報20.20元，聯通（762）則跌4.7%，收5.10元。
專家話，中電信可以蝦到香港電訊商，主要是因為香港致電國內比國內致電香港為多，所以本港電訊商議價能力有限，但中電信與國內移動網絡商嘅議價能力唔算太強，唔到中電信話加就加，因為中移動及聯通一樣可以大幅調高固網致電往移動網絡接駁費，所以噚日兩股遭大幅拋售，反映投資者有啲唔理性。
鄭州燃氣（8099）首日上市，較招股價0.25元高58%，收0.395元。據聞有資金從其他燃氣股換馬捧場，中華城市燃氣（603）遭拋售，跌9.1%，收報9仙。
近期市場傳出港府停止賣地，新世界系彤叔近日好似港府「代言人」，話將停止賣地。不過，噚日佢又話，你知幾多我知幾多，亦即係間接承認之前放流料。其實港府發言人已否認有此決定，結果地產股回跌。現時本港地產市場供過於求，若港府唔再停止批地，樓市勢將繼續下滑。
阿虎