個市失驚無神大跌219點，啲Call輪自然雞毛鴨血，啲Put輪則大領風騷。
國泰Put輪9117、和黃Put輪9544、長實Put輪9542等，件件升幅都喺2成以上。9117升夠29%，拜國泰（293）下跌40仙所賜；隻輪下月18日到期，現價14.4仙，溢價0.4%，槓桿率7.9倍。正股有下試11元齊頭機會，重有40仙下調空間，9117有機會升多3成。
散得最厲害嘅係華能Call輪9267，由17.1仙碌落6.3仙，下月中到期，現價6.3仙，溢價6.4%，槓桿率90.5倍。正股（902）收5.70元，跌25仙，基金舞上舞落，揸9267未必輸梗，但入市賭呢隻輪要抱住輸晒嘅心理準備。
華創（291）近期波幅好大，昨日跌45仙，跌幅5.5%，搞到其中3件Call輪大散33%至53%。華創上落變化好快，啲Call輪適合冒險家炒上炒落，9121比較啱玩，明年1月到期，現價31.5仙，溢價12.9%，槓桿率24.4倍。食得鹹魚抵得渴，炒9121可以賺好多，亦可以好傷。九倉（004）有隻Call輪9190，登上死火榜，收7.3仙，挫低33%。呢件唔係絕對死火，下月到期，溢價2.3%，槓桿率21.6倍。正股趣趣哋升番1蚊嘅話，9190可值13仙，幾乎升夠1倍。
章盛