有傳唔啱傾嘅張栢芝新舊男友謝霆鋒同陳小春，前晚前後腳到香港殯儀館拜祭羅文。佢哋就算見到面都冇打招呼，一人坐一邊，霆鋒喺靈堂逗留咗十幾分鐘，就即刻同老竇謝賢一齊走人。
霆鋒前晚同謝賢一齊到香港殯儀館，霆鋒去到靈堂之後，就向羅文鞠躬，之後佢就行咗去沈殿霞（肥姐）身邊傾偈，霆鋒同肥姐傾傾吓之際，小春就出現，不過小春就坐咗喺另一邊，同霆鋒各據一方，冇傾偈亦冇打招呼，互相當對方透明。
小春向羅文鞠躬嗰陣時，霆鋒都有望到佢，但係霆鋒坐咗冇耐，就同謝賢急急腳離開。
黎小田前晚揸車喺銅鑼灣出現，佢一見到記者影相，即刻撇低同車嘅女性朋友，自己落車傾電話，認真冇風度。問黎小田車入面嗰個係咪佢女友？佢話：「咪影囉，你哋都唔識佢。」
此外，英皇老闆楊受成、黃霑、劉培基同張徹太太前晚守靈完畢後，就一齊去銅鑼灣欣葉台灣料理消夜。
最近發生嘅城中大事，過氣大佬未搞清楚就走出嚟扮晒代表講嘢，呢位大佬之前投資拍戲又唔掂，投資生意又衰咗，佢講啲嘢擺到明就係想擦某人鞋。點解要咁做？因為之前做生意，爭落人哋好多租金，所以諗住自己出嚟做清兵，可以攞到啲着數囉！
溫柳媚自從早年遇上交通意外後，一直好少出席公開場合。噚日羅文出殯，溫柳媚着住全黑套裝裙同圍住頸巾，去到香港殯儀館送老友最後一程。
溫柳媚去到殯儀館時已不斷用紙巾抹眼淚，喊到眼腫腫，儀式完咗之後，佢又喊住咁走，睇到都心酸。
林燕妮同黃霑呢對歡喜冤家，噚日前後相差唔夠一分鐘去到香港殯儀館，雙雙送好朋友羅文最後一程。林燕妮同黃霑入到靈堂之後，可能因為黃霑要扶靈，要坐喺靈堂嘅最前方，而舊情人林燕妮就冇理佢，自己坐喺靈堂後排，所以佢哋一直都冇機會傾偈。