我求大俠喺過去五個月幾乎日日都望NBA快啲開波，今日終於望到NBA開鑼啦，點知竟然連一場直播嘅比賽都冇得睇，你話我哋呢班餓咗波成五個月嘅NBA迷幾咁冇癮同失望。
最氣頂係，今季嘅NBA直播賽事每個禮拜只得嗰兩場，竟然比上季重要少一場。最離譜嘅係啲直播波又齋又寡，幾乎全部都集中晒係湖人同76人身上，淨係十一月呢兩隊波就各有三場比賽直播，佔咗成嗰月嘅直播賽事六成，根本冇照顧到其他球隊擁躉嘅需要。
其實我求大俠都好替我哋香港班NBA迷可憐。人哋國內嘅籃球迷喺今季開始，每個禮拜都最少有四至五場嘅NBA直播波睇啦！反觀香港嘅NBA直播比賽就愈播愈少、本末倒置！冇辦法啦！六百萬人口嘅市場點同國內嘅十三億人口嘅市場比呢？唔通要我哋呢班香港NBA發燒友個個禮拜北上睇波咩！
上個禮拜六米杜士堡黑人中場保定話列斯中場班比種族歧視佢單嘢，班比當然死口唔認有講過，重話保定講大話唔眨眼。班比話保定希望將事件同種族扯埋欄，目的係去掩飾保定喺球員通道，用大力金剛指𢱑損佢塊面，搞到佢破相嘅罪行。我求大俠唔知邊個啱邊個唔着，總之就希望呢單嘢唔好愈搞愈大，唔好將足球搞到咁複雜。
英國有支叫巴斯大學嘅足球隊，除咗成為一百二十二年以來首支參加英格蘭足總盃嘅大學球隊外，竟重可以喺禮拜一外圍賽，以互射十二碼淘汰一支聯賽球隊。唔好話我求大俠只識喺足球到吹水，其實我都好留意下一代嘅發展㗎，巴斯嘅成功，對照我哋前排嗰班喺迎新營大叫鹹濕口號，道德淪亡，睇低中國文化嘅師兄師姐大學生，真係高高在上，本地大學生起來吧！快些快些踢波吧！
近排連番輸高波，黑過墨斗嘅阿仙奴門將施文又畀人踩一腳。話說阿仙奴今晚嘅歐冠盃對手多蒙特主將羅斯基，竟然話佢哋全隊波要求「兵工廠」領隊雲格繼續用施文守龍門，因為咁樣可以有更多入球機會。我求大俠就話羅斯基你咪少年得志，語無倫次，其實每個人都有高低潮，羅斯基你都唔例外，你千期唔好畀我見到你射空門都唔入，否則我一定好黑心咁話：呢啲就係報應嘞。
今屆降班嘅葉士域治最近有新任領隊萊奧走馬上任，呢位帶領曼城升上英超嘅人物，立即話可以幫𠵱家喺英甲排第十七位嘅葉士域治升番上英超，而佢嘅豪語亦都畀到博彩公司信心，結果將該隊升班賠率定為五點五倍，都算熱㗎。話時話，葉士域治𠵱家排名咁低，萊奧要打番起隊波真係有排搞㗎，吹水係人都得，我求大俠就放長雙眼睇吓你點搞！