香港電台日日俾徐大炮鬧，話佢哋唔肯做特區喉舌，搞到朱培慶頭都大埋。不過，北京似乎較寬鬆，早前已經正式批准港台係北京朝陽區外交人員公寓設記者站，八方聽聞北京辦事處嘅法定代表人（或者叫持牌人）張圭陽已經上京坐鎮。而首個駐京記者李禾德亦已抵京，為十一月一日開咪做好準備，至於第一日有乜獨家料，港台話賣個關子不作事先張揚，咁睇都離唔開十六大。
至於商台，陳淑薇話佢哋也在積極籌備中，八方都知道商營機構做嘢，梗係要計算清楚，特別𠵱家咁嘅環境，點敢輕舉妄動。而下個月十至十一日，公營廣播機構國際年會會係香港開大會，都算係城中盛事。
傳真︰2623-9278
電郵︰