港區人大代表選舉今年有成千人投票，一直慣咗由阿爺「分餅仔」班親中人士，突然要佢哋真係去拉票，自然唔知點好，於是凡係有選民出席嘅公開場合都撲到去。八方聽聞早排港區政協重神神秘秘搞咗個活動，方便「有心人」拉關係。
話說港區政協每年四月例牌喺東莞峰景高爾夫球會搞聯誼，不過一直冇乜人去。上星期六政協突然「加碼」，又再去峰景打波，最神奇係今次人頭湧湧，唔少有意選人大嘅人都蒲頭，好似曾德成、王如登、王英偉同劉佩瓊咁，連唔打波嘅李鵬飛都有去，立會主席范徐麗泰一樣六、七點趕上去食飯，佢哋一見到有票嘅政協就飛撲埋去。
有愛國愛港人士話好難怪佢哋，𠵱家兵荒馬亂，連早排猛咁傳話唔選嘅資深人大吳康民都可能再去馬，頂中聯辦主任高祀仁個位。雖然傳聞未必成真，但已可以見班人幾驚又少一個位。
傳真︰2623-9278
電郵︰