曾經當紅嘅電台節目主持人白韻琴，早排因逃稅入獄，出來後行事低調咗好多，但啱啱俾人發現佢賣出揸咗十二年嘅渣甸山柏麗園豪宅，勁賺440萬。
層樓係用白韻琴個名登記，九○年買入，樓價280萬，面積一千七百幾呎，啱啱以七百二十萬賣出，呎價四千一百幾蚊，比市價平少少。代理話，如果唔係佢一時封吓，一時放吓咁揸唔定主意，個單位早就賣咗，價錢可以高啲。一個差唔多層數同面積嘅單位，今個月賣咗798萬，比白姐姐嗰間高出超過一成。
聽代理講，白姐姐買入單位後一直自住，裝修得唔錯，住咗十幾年，對層樓有感情，唔怪得佢拖拖拉拉兩年先賣出層樓，不過，總算了結心事。
白姐姐𠵱家搬咗去銅鑼灣百德新街某幢舊樓度住，居住環境梗係冇得同渣甸山比。
素來貨量不算多嘅嘉華地產，近排積極推銷旗下住宅項目。九龍塘廣播道嘅嘉皇臺，集團幾年前投得地皮後，一直珍而重之，希望成為九龍區豪宅指標盤。
聽講，呢個精心傑作今年底入伙，下個月重會搞個池邊派對（poolsideparty），請來一眾賓客睇吓個盤有幾靚。
不過，地產代理噚日已親身睇咗二千三百方呎現樓示範單位。
稱得上豪宅，價錢當然唔平，三十八樓二千三百呎單位，要一千九百三十萬。
至於十一樓近1400呎單位，起碼800萬以上。聽講噚日現樓重見到好多名貴汽車，估計係買家。
一手樓市近排好淡，地產代理趁空檔去「充電」。美聯精英會計劃下月去泰國曼谷三日，進行「精英跨國特訓」，備戰新一輪新盤潮。
聽布少明話，原本諗住十一月中出發，但係同九龍倉黃光耀傾開，收到風尖沙嘴擎天半島二期會喺呢段時間開賣，所以提前喺六號出發，趕番嚟做擎天半島。
今次有五個董事同三十名精英有得去泰國，但精英會嘅會員有成六十幾人，所以只有九同十月做到最多數嘅三十個精英，先可參加。聽日就知結果嘞。
另外，美聯培訓及發展部，最近搞咗個「減壓工作坊」，教授減壓之道。經濟愈唔好，打工仔愈需要減壓，唔係點應付有加冇減嘅工作量呢？
新世界集團最近重組，太平洋港口成為系內基建同服務項目旗艦，新世界基建執行董事陳錦靈出任太港董事總經理一職。
機構每逢重組，系內員工都會擔心會唔會炒人，據聞，新上任嘅陳錦靈上個禮拜五搞咗個大會，同啲員工見面，講吓公司最新狀況，好明顯係安撫員工。聽講出席嘅員工有近三百人。不過，效果係點，就不得而知。
阿姐汪明荃，喺樓市高峯期買入中半山皇朝閣單位，啱啱以萬三蚊租出，單位六百四十一呎，呎租二十蚊三毫，係市值租金。據講個單位原以萬八蚊放租，𠵱家平咗三成租出。
皇朝閣喺中半山一帶嘅豪宅中最新嘅物業，只有八年，單位面積又唔係幾千呎，向來都係細細粒容易食。
蘭西
電郵地址：