立法會一年一度嘅同樂日又係時候舉行，八方諗番起去年玩到癲嘅情景，仍然想笑，例如模仿政治人物時，連「萊溫斯基」條「有迹」裙都出埋；鹹濕笑話同政治不正確嘅對白滿天飛。今年唔知係咪經濟低迷，由議員同記者組成嘅同樂日籌委會，噚日傾起節目時，都冇舊年咁興致勃勃。
有記者提議搞頒獎禮，頒發「最美妙插水獎」同「最佳刀法獎」畀問責高官，明眼人一睇就知，係為梁錦松及梁愛詩度身訂做，可惜被籌委會主席周梁淑怡以官員到時不會到場為由否決咗，阿松同詩姐姐避過一劫。
又有記者提議，大家扮Twins、F4同Cookies等青春組合，八方一聽到，重鬼咁有幻想力喺度諗緊：邊兩個尊貴議員扮Twins最似呢？張宇人同勞永樂兩個歡喜冤家？又邊個會似F4嘅仔仔同言承旭？重有，邊九個議員肯着Cookies嘅超短裙仔？
點知班議員又大力反對，周梁再次出手解圍，佢話對呢班新偶像唔多認識，年齡又有距離，都係咪搞。所以個半月後，喺立法會大樓宴會廳內舉行嘅同樂日，議員同記者只會乖乖咁排排坐，猜吓謎、唱吓歌、食吓嘢……
傳真︰2623-9278
電郵︰