真係好嘅唔靈醜嘅靈，經紀陳個幾星期前提過嘅捷美能源（702），呢兩日疲態畢現，股價似乎低處未見低。經紀陳提及捷美之時，股價重有0.45元，但噚日最低見過0.33元，收0.365元，跌8.75%。
小初打電話問經紀陳原因，佢話上次講到捷美時，已提過捷美雖繼續獲歐資大行品題推介，但股價卻未因此受惠，炒家無法散貨，手上子彈已經所剩無幾。
雖然係咁，班炒家仍然出出入入，維持秩序。點知呢個零星期，佢哋連蹤影都冇埋。現時唔肯定炒家係咪彈盡糧絕，定係如市場傳聞，有關人等正在玩內訌。
總而言之，只要係以上任何一個原因，隻股恐怕短中期內都難有起色。家陣民企股爆煲事件日日新鮮，就算有人想出手相助，都好難成功。
講到呢班幕後炒家，其中一名軍師乃資深賓架，其他亦非平庸之輩，但估唔到咁強勁陣容，亦落得如此下場。
慕容小初