本月中唐閣的三葱爆龍蝦在「2002美食之最大賞」龍蝦組別獲得「至高榮譽金獎」，鍾意食龍蝦的歌星周永恒（阿Roy）聞風而至，在短短一個星期間苦練炮製龍蝦技術，誓要向這位兩連冠的蕭師傅切磋切磋，順便偷師，在未比賽之前相信你同我都一早知道結果，所以決定找一班阿Roy的Fans作評判，令他輸得心服口服！
記者：陸伊琳 攝影：陳偉強
鳴謝：一班「勇於試食」的周永恒Fans
知道蕭師傅名氣咁響，阿Roy決定越級挑戰，走入廚房與蕭師傅較量。雖然Roy已經準備了一星期，但當落場煮龍蝦時，竟然話畀小記聽怕大火同滾油，重唔學師傅咁先泡油，索性就咁放龍蝦落鑊「煎」，煮到一半時重要師傅提佢落調味料，結果啲龍蝦煮到過晒火。雖然Fans亦坦言味道同色澤都不及蕭師傅，但蕭師傅亦讚賞一個門外漢有如此水準，已絕對算是及格了。
上屆以金錢鮮蝦球奪得海鮮蝦組別的至高榮譽金獎的蕭師傅，今屆憑其香味十足的三葱爆龍蝦再奪龍蝦組別的最高殊榮，對於蝦種的菜式實有一手。小記和幾個飲食的行家傾起當日比賽之事，有位食肆經理表示：「一落鑊就知道唐閣嘅三葱爆龍蝦會贏，事關嗰種香葱嘅氣味籠罩住整個會場，香氣撲鼻！」
比賽菜式：三葱爆龍蝦
計分方法：十位評判，其中六位是阿Roy的Fans，一眾試食兩位炮製的三葱爆龍蝦，投票畀分。
今次阿Roy可謂向高難度挑戰，比賽結果其中一票棄權，蕭師傅以九票大熱勝出，雖然結果早已預算得到，但出奇的是Fans沒有盲目追捧偶像，坦白說出食後感。
「其實我啲龍蝦味道會同師傅嘅差不多，因為我出咗貓，用嘅醬汁係由師傅調製嘅，但試完佢嘅三葱爆龍蝦，我的確差一皮，泡過油，火候夠，肉又爽，好入味！」
三葱即肉葱、紫洋葱及乾葱，入口比蒜茸蒸及芝士煮較搶，但又不會蓋過龍蝦鮮味。
用豆豉來炒龍蝦，加入秘製味菜及紅青椒，味道濃郁，和炒麵成了絕配。
棄用芝士作芡汁，以芝士和蒜來焗香龍蝦球，食落乾身，味道較清。
電話：23751133
地址：尖沙嘴北京道8號鷹君酒店1樓
營業時間：星期一至六（12:00nn-3:00pm、6:00pm-11:00pm）、星期日及公眾假期（11:00am-3:00pm、6:00pm-11:00pm）