承接美股上周五造好，好友在結算前當然會借勢加把勁炒上，不過港股升至9860後明顯遇上壓力，恒指收市報9853，升131點，但成交不足50億元。
據聞大戶認購中國電信（728）反應尚算踴躍，不過從來大戶認購都是篤手指，暫時重未需要科水住，所以中移動（941）及中國聯通（726）相信可以捱到期指結算，之後就好難講。無論中電信招股價吸引與否，國內電訊股在市場供應增加，必會為大市帶來一定壓力。
唯冠國際（334）噚日沽盤明顯增加，午後更一度下跌近31%，低見0.335元，收報0.34元，成交645萬元。黑客話冇特別原因，主要因為近期股價積弱，有證券行迫客搬倉，現時細價股要轉新倉唔容易，加上唔少做開細價股嘅證券行，執吓一間又一間，炒家落腳地方愈來愈少，相信呢類情況只是開始，細價股因為被迫搬倉而急挫，會陸續有來。
長江生命科技（8222）先前有唔少不利傳聞，令人提心吊膽，不過股民永遠是善忘的，不利傳聞的影響開始淡化，最近有一眾經紀牌密密收集，股價由低位1.20元水平反彈至噚日收市1.45元，似乎有人正在做緊嘢。
e莉莎話聽唔到消息，但長科股價遠低於招股價，以超人性格，相信至少都要抽番上水面，好向捧場客有個交代。不過，幾時可以開車就唔知啦。
冠華（539）最近升勢急勁，主要因為先前有基金增持。噚日突然再抽高23%，收1.15元，唔知係咪有人想抽高散貨呢？不過，由於就快到基金年尾結算，芬佬如非必要都不會散貨推低股價，相反重要繼續將股價推高，粉飾櫥窗。
阿虎