寶蓮寺「封山」事件搞到監院法師釋智慧鬼咁紅，連日嚟不斷俾傳媒追訪，想聽吓佢重有冇出位言論。八方噚日收到料，知道釋智慧法師去咗佛教黃鳳翎中學主持一個儀式，所以專登去睇一睇，結果不負眾望，智慧法師果然又再語出驚人，要求我哋《蘋果》嘅總編同主筆放佢「一條生路」，重承諾日後言論唔會咁輕佻，會莊嚴一啲。
本來八方都唔明點解釋智慧法師會叫《蘋果》放佢一馬，但後來諗真啲，原來釋智慧法師曾經口花花，撩過無綫同亞視嘅女記者；唔單止咁，佢又同記者講當年，話想考演員，又話有記者話佢似尤伯連納，搞到記者覺得佢好風趣，完全唔似一個法師應有嘅行為；加埋第二日啲報紙標題，份份都圍繞釋智慧法師，對寶蓮寺就好少提及。
唔知喺唔喺受到寺方壓力，釋智慧法師同記者講，當日同傳媒所講嘅「當年情」，只喺想記者輕鬆一吓，唔使咁成日都講封山咁悶同咁辛苦。原來法師出於好意，重話冇怪傳媒當日嘅報道。最後釋智慧法師重雙手合十，話日後傳媒點報道佢嘅新聞，都會好開心。法師果然心胸廣闊，八方真喺要學吓。
傳真︰2623-9278
電郵︰